Як прыход лаўкостараў і бязвіз выклікалі бум авіяперавозак ва Украіне
Аляксандр Лукашэнка ў сваім звароце звярнуў увагу на тое, што беларусам выгадна лятаць на самалётах з Кіева, Вільні, адкуль заўгодна, але не з Беларусі. І сапраўды — палёты з Мінска дарагія ў параўнанні з палётамі з суседніх краін.
Гэта звязана з тым, што ў Беларусі дагэтуль не працуюць папулярныя еўрапейскія лаўкостары. Пакуль у краіну не могуць прыйсці нават расійскія лаўкостары, а прыход Ryanair ці Wizz Air нават не абмяркоўваецца.
У гэты ж час ва Украіне зрабілі стаўку на прыход лаўкостараў. Разам з бязвізам у зону Шэнген гэта дае свае вынікі — украінцы атрымалі даступныя палёты па адэкватных цэнах, што выклікала імклівы рост авіяперавозак у краіне. І гэта прытым, што самы папулярны еўрапейскі лаўкостар Ryanair яшчэ не пачаў працу ва Украіне — кампанія распачне палёты сёлета у верасні з Кіева, Львова і Херсона. Квіток да Лондана з Кіева будзе каштаваць 43 еўра, а са Львова — 30 еўра.
Але нават і без Ryanair ва Украіне дастаткова авіякампаній з даступнымі квіткамі: WizzAir, Air Arabia, Fly Up, Aegan, YanAir і іншыя.
І нават без Ryanair (які хутка з'явіцца), украінскія аэрапорты (у тым ліку рэгіянальныя) паказваюць імклівы рост колькасці пасажыраў.
За 2017 год аэрапорты Украіны абслужылі 16,5 мільёна пасажыраў, 14,6 мільёна з іх — міжнародныя рэйсы (рост на 29,2% у параўнанні з 2016 годам). Асобныя аэрапорты адзначыліся яшчэ больш.
«Кіеў-Жуляны» абслужылі 1,852 мільёна пасажыраў, што на 64,2% больш, чым ў 2016 годзе.
Львоў прыняў 1 мільён 80 тысяч пасажыраў (на 46,3% больш, чым ў 2016 годзе).
Харкаў абслужыў 806 тысяч пасажыраў, рост на 35% за год.
Малаімаверна, што беларусы пачнуць лятаць у Еўропу з Украіны — зручней, як і раней, рабіць гэта з Літвы і Польшчы. Але імклівы рост авіяперавозак ва Украіне паказвае, што прыход лаўкостараў паляпшае мабільнасць насельніцтва і спрыяе турызму, у тым ліку ўязному.
Каментары