Актывісты Кансэрватыўна-Хрысьціянскай Партыі БНФ затрымалі вандалаў у Курапатах. Іх перадалі ў рукі міліцыі.
У суботу а 21.30 ва ўрочышчы Курапаты грамадзкія актывісты затрымалі двух маладзёнаў, якія ламалі крыжы.Пра гэта паведаміў адказны сакратар управы Кансэрватыўна-Хрысьціянскай Партыі - БНФ Алесь Чахольскі.
Пасьля актаў вандалізму напачатку тыдня грамадзкія актывісты кантралявалі ўрочышча. Як паведаміў адзін зь іх, Алег, які пажадаў захаваць ананімнасьць, ён і яны сябра патрулявалі ўрочышча і пабачылі двух маладзёнаў, якія падышлі да крыжоў і пачалі іх ламаць. Яна павалілі і зламалі пяць крыжоў. Грамадзкія актывісты затрымалі іх і выклікалі міліцыянтаў. Паводле сп. Алега, вандалы былі нецьвярозыя, нецэнзурна лаяліся. Пакуль чакалі прыезду міліцыі, хлопцы выклікалі сваіх бацькоў. Прыехала маці аднаго зь іх і ўгаворвала міліцыянтаў не затрымліваць яе сына, бо ён непаўналетні.
Пасьля званкоў хлопцаў прыехалі таксама некалькі мужчынаў, але яны не прадставіліся.
Супрацоўнікі міліцыі разам з затрыманымі вандаламі і двума грамадзкімі актывістамі ў якасьці сьведак накіраваліся ў аддзел міліцыі ў Бараўлянах. Праводзяцца сьледчыя дзеяньні.
«Адбылося тое, што павінна было адбыцца. Напярэдадні Дзядоў гэта знак Божы, калі ўвага людзей зьвернута да Курапатаў, да Дня памяці продкаў», - кажа Юрась Беленькі, намесьнік старшыні КХП-БНФ.
Каментары