Аляксандр Лукашэнка даручыў да лістапада 2020 года зрабіць Аршанскі мясакансервавы камбінат адным з лепшых прадпрыемстваў галіны. Такую задачу кіраўнік дзяржавы паставіў сёння ў час наведвання завода, піша БелТА.
Кіраўнік дзяржавы азнаёміўся з арганізацыяй яго працы і вытворчай базай. Наведаўшы некалькі цэхаў, ён раскрытыкаваў гаспадарчую дзейнасць прадпрыемства, тое, як утрымліваюцца памяшканні і матэрыяльна-тэхнічная база.
«Да 7 лістапада 2020 года тут гэтага быць не павінна. Трэба выдзеліць сродкі, арганізаваць новы забойны цэх, усё гэта пазносілі (у дачыненні да старых будынкаў) і зрабіць сучаснае прадпрыемства. Яно павінна быць як самыя лепшыя мясакамбінаты», - падкрэсліў ён.
Аляксандр Лукашэнка таксама пабываў у ААТ «Оршааграпраммаш», якое ўваходзіць у холдынг «Бабруйскаграмаш». Яго праінфармавалі аб фінансава-эканамічных паказчыках завода, прадэманстравалі прадукцыю і распавялі пра перспектывы развіцця прадпрыемства.
Генеральны дырэктар «Бабруйскаграмаша» Аляксандр Ерамееў папрасіў дапамагчы ў рэструктурызацыі даўгоў. Усяго холдынгам маецца крэдытаў прыкладна на Br50 млн. «Падрыхтаваны праект указа, узгоднены з міністрамі. Атрымаецца эканамічны эфект у Br10,2 млн, - адзначыў Аляксандр Ерамееў. - Мы грошай лішніх не просім, толькі адтэрміноўка».
Кіраўнік дзяржавы даручыў кіраўніцтву Адміністрацыі прэзідэнта тэрмінова разабрацца ў гэтым пытанні, далажыць у бліжэйшы час і ўнесці свае прапановы.
«Але май на ўвазе, не дай бог, не будзе выкананы указ і ты зноў прыйдзеш па адтэрміноўку або растэрміноўку — крыўдуй сам на сябе», — папярэдзіў Аляксандр Лукашэнка.
Цяпер чытаюць
Памілаваныя 15 чалавек, сярод якіх 13 палітвязняў4
Каментары