У Крыме прайшлі новыя ператрусы ў крымскіх татараў, затрыманыя некалькі чалавек
Рух «Крымская салідарнасьць» і праект «Крым.Реалии» паведамілі пра некалькі ператрусаў у дамах крымскіх татараў, якія адбыліся раніцай 4 верасьня.
Марлен Мустафаеў
У мікрараёне Каменка пад Сімфэропалем ператрус адбыўся ў хаце актывіста Марлена Мустафаева. Пасьля ператрусу Мустафаева адвезьлі ў аддзяленьне паліцыі. Паводле інфармацыі жонкі затрыманага, супраць Мустафаева завялі справу паводле артыкулу 282 ч. 1 расейскага крымінальнага кодэксу (распальваньне нянавісьці альбо варожасьці, прыніжэньне чалавечай годнасьці).
Расейскія сілавікі не камэнтуюць ператрус, а адвакат Мустафаева Эдэм Семедляеў паведаміў, што яго не пускаюць да падабароннага.
У лютым 2017 году ў доме Мустафаева праходзіў ператрус па справе аб дэманстрацыі «экстрэмісцкай сімволікі». Сілавікі канфіскавалі ў Мустафаева кампутарную тэхніку і некалькі кніг. Пазьней Мустафаева арыштавалі на 11 сутак, абвінаваціўшы ў дэманстрацыі экстрэмісцкай сымболікі.
Зарэма Куламетава
У Старым Крыме раніцай 4 верасьня ператрус адбыўся ў хаце Зарэмы Куламетавой. Паводле дадзеных «Крымскай салідарнасьці», сілавікі затрымалі мужа Зарэмы Зэкія Куламетава і дачку Рыяну Куламетаву: тыя ўступілі ў спрэчку зь сілавікамі. Рыяна Куламетава паведаміла «Крым.Реалии», што расейскія сілавікі павезьлі яе маці ў невядомым кірунку.
Паводле дадзеных «Крымскай салідарнасьці», пасяджэньне па адміністрацыйным правапарушэньні Зарэмы і Рыяны Куламетавых адбудзецца ў Кіраўскім раённым судзе ў пасёлку Кіраўскае ўдзень 4 верасьня.
У лютым 2018 году Зарэму Куламетову выклікалі ў аддзяленьне паліцыі. Паліцыянты заявілі, што Куламетава абражала і пагражала жыцьцю і здароўю намесьніка начальніка расейскай паліцыі па Кіраўскім раёне Андрэю Рагожыну у дзень затрыманьня яе сына Гірэя Куламетава. У красавіку 2018 году Кіраўскі раённы суд прызнаў Куламетаву вінаватай у публічнай абразе паліцэйскага і пакараў яе 250 гадзінамі абавязковых грамадзкіх работ і штрафам 20 тысяч расейскіх рублёў (каля 600 беларускіх).
Абдулах Якубаў
У Старым Крыме ператрус таксама адбыўся ў хаце крымскататарского актывіста Абдулаха Якубава. У яго канфіскавалі ноўтбук, які належаў яму асабіста, але сам Якубаў пакуль ён не затрыманы. Ператрус, паводле яго, праходзіў паўтары гадзіны, сілавікі «былі ветлівыя, асаблівага гармідару ў хаце не зрабілі».
Цяпер чытаюць
«Звяжыцеся з намі»: Пракоп'еў напісаў калонку для «НН», у якой абгрунтоўвае знаходжанне Ціханоўскага ў Штатах і просіць грошай41
«Звяжыцеся з намі»: Пракоп'еў напісаў калонку для «НН», у якой абгрунтоўвае знаходжанне Ціханоўскага ў Штатах і просіць грошай
Галіна Дзербыш казала пракурору: «Як памру, буду да ўсіх вас ноччу прыходзіць». І жыццё ўжо дагнала яе суддзю і сведак. Гісторыя пенсіянеркі, якой далі 20 гадоў калоніі1515
Каментары