Экс-прэзідэнт Грузіі Міхаіл Саакашвілі адказаў на закіды Аляксандра Лукашэнкі зробленыя ўчора беларускім кіраўніком у інтэрв'ю турэцкаму інфармацыйнаму агенцтву «Анадалу».
«Дарагі спадар Лукашэнка, калі ласка, не блытайце нешта з пальцам. Я і Парашэнка, як кажуць у нас у Адэсе — гэта дзве вялікія розніцы, і ў іншых краінах я не «хаваюся», мяне проста часова не пускаюць у мае краіны», — напісаў ён у сваім фэйсбуку.
Нагадаем, што ўчора Аляксандр Лукашэнка заявіў, што не будзе займацца аналітыкай і параўноўваць двух кандыдатаў: Пятра Парашэнку і Уладзіміра Зяленскага.
«Аднаго я вельмі добра ведаю. Другога я бачыў толькі ў кіно, я яго як палітыка не ведаю. Але я вам скажу ад жыцця: у нас з Парашэнкам быў калісьці агульны сябар — гэта Міхаіл Саакашвілі. Калі Саакашвілі праводзіў выбары, будучы прэзідэнтам (Грузіі), канстытуцыю памяняў, яшчэ нешта — пачалі з народам займацца жартамі. Гэта прывяло да таго, што яму давялося пакінуць Грузію і хавацца ў іншых краінах.
Каб Парашэнку не прыйшлося залазіць на дах і з даху заклікаць украінцаў абараніць яго, ён зробіць усё для таго, каб украінцы яго падтрымалі. Ён павінен зрабіць усё для таго, каб народ падтрымаў яго», — падкрэсліў ён.
Трэба таксама зазначыць, што Саакашвілі, які стаў прэзідэнтам у студзені 2004 года, на фоне пратэстаў у лістападзе 2007 года падаў у адстаўку і ў студзені 2008 года паўторна выйграў выбары. А ў кастрычніку 2013 года выбары выйграў Георгій Маргвелашвілі, бо паводле Канстытуцыі, Саакашвілі не меў права балатавацца на трэці тэрмін. Саакашвілі, не чакаючы заканчэння прэзідэнцкага тэрміну, пакінуў Грузію і выляцеў у Брусэль.
А на дах экс-кіраўнік Грузіі залазіў ужо ў Кіеве ў снежні 2017 года.
Служба бяспекі Украіны абвінаваціла палітыка «ў садзейнічанні ўдзельнікам злачынных арганізацый і ўтойванні іх злачыннай дзейнасці». Сцвярджаецца, што Саакашвілі ўвайшоў у кантакты з агентамі Расіі і былым украінскім міністрам па падатках і зборах Курчанкам, які хаваецца ў Расіі і падазраецца ў здрадзе радзіме.
Цяпер чытаюць
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1616
Каментары