У Мінску на вуліцы Шырокай, 3 эвакуіравалі ўсіх жыхароў новабудоўлі, якая была здадзена ў эксплуатацыю ў 2014 годзе, піша Tut.by
Як аказалася, жыхары паўтара года таму яшчэ пісалі звароты ў розныя інстанцыі з просьбай вырашыць пытанне з апорнай калонай у другім пад'ездзе. Тыдзень таму спецыялісты прыступілі да рамонту. Як мяркуецца, у выніку гэтых работ пачалося разбурэнне калоны, што прывяло да пагрозы абвальвання дома.
— Нам сказалі ўзяць пашпарты і выйсці ўсім на вуліцу. Дом ачапілі, нікога унутр не пускаюць. На фасадзе бачныя расколіны, — распавёў мясцовы жыхар Аляксандр.
«26 красавіка ў жылым доме № 3 па вул. Шырокай будуць праводзіцца работы па ўзмацненні маналітнай калоны другога пад'езда. З мэтай бяспекі жыхароў дома і дадатковых мер засцярогі на час рамонтных работ будуць арганізаваны мерапрыемствы па вывадзе людзей. Рамонтныя работы працягнуцца ад 4 да 6 гадзін. Меркаваны час заканчэння — 20.00», — пракаментавалі сітуацыю ў Мінгарвыканкаме.
У адміністрацыі Савецкага раёна прынеслі прабачэнні за дастаўленыя нязручнасці і папрасілі жыхароў дома паставіцца з разуменнем да часовых зменаў.
У цяперашні час спецыялістамі камунальных службаў раёна праводзіцца пакватэрнае апавяшчэнне жыхароў.
Часовае знаходжанне жыхароў арганізавана ў сярэдняй школе № 178, размешчанай па адрасе па вул. Усходняя, 68.
Каментары