Навальны знайшоў элітную нерухомасць у супрацоўніка ФСБ з расследавання журналіста Галунова
Расійскі апазіцыянер Аляксей Навальны апублікаваў расследаванне пра падпалкоўніка ФСБ Марата Мядоева, які згадваўся ў сувязі са справай журналіста Івана Галунова. Арыштаваны журналіст Іван Галуноў заяўляў, што звязвае сваю справу з расследаваннем пра сувязі Мядоева з пахавальным бізнэсам.
Навальны на падставе выпіскі з Адзінага дзяржаўнага рэестра нерухомасці паказвае, што ва ўласнасці ў Мядоева знаходзіцца кватэра плошчай 200 кв. м у Маскве коштам больш за $3 мільёны.
Яшчэ дзве кватэры на вуліцы Казакова (дом 17/1 буд.1) па 100 кв. м. за $460 тысяч. Адна з іх аформлена на яго бацьку, іншая — на сына. На жонку падпалкоўніка запісаная двухпавярховая кватэра ў іншым доме на вуліцы Казакова (дом 27) плошчай 180 кв. м коштам $1,2 мільёна, адзначае Навальны. Акрамя таго, па яго даных, сям'і Мядоева належыць нежылое памяшканне плошчай 948 кв м на вуліцы Казакова. Яно здаецца ў арэнду Маскоўскай аўтадарожнай інспекцыі.
Навальны высветліў, што адна з дачок Мядоева ў мінулым працавала ў мэрыі Масквы, а нядаўна прадала кватэру за $3,8 мільёна. Аўтапарк сям'і складаецца з шасці матацыклаў, трох Range Rover, двух Audi Q7, трох Mercedes, Porsche Cayenne і Lexus.
Журналіст «Медузы» Галуноў рыхтаваў да публікацыі матэрыял, у якім фігуруюць супрацоўнікі УФСБ па Маскве і Маскоўскай вобласці — кіраўнік упраўлення генерал-палкоўнік Аляксей Дарафееў і яго памочнік падпалкоўнік Марат Медоеў. У гэтым матэрыяле закраналася магчымая сувязь сілавікоў з рынкам пахавальных паслуг.
Журналіста «Медузы» Івана Галунова затрымалі 6 чэрвеня па падазрэнні ў збыце наркотыкаў. Рашэннем суда 8 чэрвеня Галунова змясцілі пад хатні арышт. Журналіст на пасяджэнні суда распавёў, што яму паступалі пагрозы пры падрыхтоўцы расследавання пра рынак пахавальных паслуг.
Цяпер чытаюць
«Мікалая білі, дзе толькі яго бачылі». Пра катаванні зняволенага анархіста Дзядка расказала адвакатка Мацкевіч5
Каментары