8 жніўня — Mortal Kombat па-беларуску, яго ўжывую агучаць Гуркоў, Станюта і Харланчук
У кінатэатры «Масква» (пр. пераможцаў, 13) 8 жніўня адбудзецца прэм’ера фільма «Мортал Комбат» на беларускай мове.
Адметнасцю паказу стане «жывая агучка» кінахіта 90-х. Такі фармат упершыню будзе рэалізаваны праектам «Беларускія ўікэнды». Агучка і пракат карціны здзейснены кампаніяй «Кінаконг» пры падтрымцы velcom | A1. Дадатковы паказ пройдзе 10 жніўня.
Незвычайны кінасеанс пачнецца 8 жніўня ў 19:00. Свае рэплікі «ужывую» са сцэны кіназалы будуць прамаўляць акцёры агучкі «Кінаконга»: Павел Харланчук, Сяргей Жбанкоў, Алег Гарбуз, Крысціна Дробыш. Галоўнага героя фільма — Лю Кана — агучыць вядомы спартсмен і першы двухкратны чэмпіён свету па версіі Kunlun Fight Віталь Гуркоў, а загадкавую прынцэсу Кітану — знакамітая беларуская гімнастка Меліціна Станюта.
Паказ у «Маскве» 10 жніўня адбудзецца з дубляжом у запісе. Пачнецца ён а 17:00.
Відэагульня Mortal Kombat выйшла ў 1992 годзе і адразу ж стала настолькі папулярнай, што атрымала працяг у самых розных відах, сярод якіх — знакаміты фантастычны баявік Пола Андэрсана, выпушчаны ў 1995 годзе.
У рамках праекта «Беларускія ўікэнды», які рэалізуе кампанія «Кінаконг» пры падтрымцы velcom | A1, вядомыя прадстаўнікі тэатра і кіно Беларусі ўдзельнічаюць у перакладзе і агучцы на беларускую мову замежных фільмаў, якія пасля дэманструюцца ў шырокім пракаце.
Сярод іх — «Хронікі Нарніі: леў, вядзьмарка і гардэроб», «Маленькі прынц», «Форэст Гамп», «Шторм», «Кніга Ілая», «Таямніца Келз», «Таемнае жыццё Уолтэра Міці», «Рыбка Поньё», «Падымаецца вецер», «Мой сябар жырафа», «Вогненыя калясніцы», «Неверагодны містар Фокс», а таксама класіка каляднага кіно — фільмы «Моцны арэшак», «Гэта цудоўнае жыццё» і «Адзін дома».
Падрабязная інфармацыя аб праекце «Беларускія ўікэнды» і яго іншых паказах — на сайтах kinakong.by і velcom.by.
Цяпер чытаюць
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы46
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы
Беларускія абрады, арнаменты і беларуская мова паўсюль. Як нашчадак перасяленцаў зрабіў сяло каля Байкала зноў беларускім, і чаму гэта можа хутка скончыцца1414
Каментары