БЧ адмяніла цягнік самага далёкага маршруту ў краіне Брэст — Камунары, піша tut.by. Ён быў у дарозе 876 кіламетраў і праходзіў гэтую адлегласць за 17 гадзін і 1 хвіліну. Ехаў з Брэста ў Магілёўскую вобласць праз Пінск, Лунінец, Баранавічы, Мінск і Оршу. Людзі, якія ездзілі гэтым цягніком з Брэста ў Магілёўскую вобласць, наракаюць, што цяпер ім прыйдзецца дабірацца з перасадкамі, а гэта нязручна.
Цягнік Брэст — Камунары з'явіўся ў раскладзе ў канцы мая 2011-га, а са снежня 2015 года стаў хадзіць штодня. Спачатку гэта быў самастойны цягнік, а затым — прычапныя вагоны да цягніка Брэст — Віцебск. Станцыя Камунары знаходзіцца на далёкай паўночнай ускраіне райцэнтра Касцюковічы ў Магілёўскай вобласці.
Канстанцін Баяр, намеснік начальніка пасажырскай службы — начальнік аддзела арганізацыі пасажырскіх перавозак Беларускай чыгункі, тлумачыць, што прычапныя вагоны прамых зносін цягніка № 658 Брэст — Камунары прыбралі з-за таго, што на ўчастку ад Мінска да Віцебска змянілася схема курсіравання цягнікоў. Ад 8 снежня паміж Віцебскам і Мінскам будуць ездзіць цягнікі міжрэгіянальных ліній бізнес-класа. І гэтыя цягнікі адпраўляюцца з Мінска і Віцебска і раніцай, і ўдзень, і ўвечары.
Да станцыі Камунары або Крычава з Брэста можна даехаць цягніком № 605/606 Брэст - Віцебск з перасадкай на станцыі Магілёў на цягнік № 633/634. Так, трэба ў 5-й раніцы выйсці ў Магілёве і перасесці на цягнік да Камунараў, і, адпаведна, вечарам таксама чакаць цягніка некаторы час.
Калі ехаць з Брэста да Крычава праз Оршу, то можна дабрацца цягніком № 96 і ў Оршы перасесці на цягнік рэгіянальных ліній бізнес-класа.
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча3
Каментары