Найбуйнейшая ў свеце амерыканская эканоміка хутка адужвае пасля выкліканага каранавірусам спаду. Палітыкі радуюцца: крызіс скончыўся, не пачаўшыся. Эканамісты папярэджваюць: святкаваць няма чаго, усё вельмі хістка, і, калі перапыніць грашовую тэрапію раней часу, шнары не рассмокчуцца цэлае пакаленне, піша bbc.com.
ЗША ўпэўнена апярэджваюць іншыя краіны па колькасці смерцяў ад Covid-19, а хаатычны адказ Дональда Трампа на найбуйнейшы крызіс яго прэзідэнцтва памяншае яго шанцы пераабрацца на другі тэрмін на лістападаўскіх прэзідэнцкіх выбарах. Белы дом спяшаецца перагарнуць сумную старонку і вярнуцца да выбарчай кампаніі, асноўным козырам якой да пандэміі і каранціну была моцная эканоміка.
Пасля тыдня станоўчай статыстыкі Трамп сабраў першы за доўгі час мітынг і пахваліўся поспехамі.
«Вашы прыбыткі крыху ўпалі, але мы вярнулі ўсё назад. Фондавы рынак б'е рэкорды. У нас фенаменальная эканоміка, нас чакае выдатны трэці квартал. І калі мы не наробім глупстваў 3 лістапада (у дзень выбараў), наступны год для нашай эканомікі будзе найлепшым у гісторыі», — сказаў Трамп групе прыхільнікаў, якія з'ехаліся на выходных у Аклахому.
Падставы для аптымізму ў яго ёсць. Звароты па дапамогу па беспрацоўі зніжаюцца ўжо 11 тыдняў запар, рознічныя продажы ўзляцелі ў маі на нябачаныя 18%, дазволаў на будаўніцтва жылля выпісана аж на 14% больш, а прамыслоўцы ўпершыню з лютага дэманструюць у апытаннях упэўненасць у будучыні.
«У нас выдатныя шанцы на тое, што эканоміка адновіцца так жа імкліва, як яна глухла, — сказаў за тыдзень да мітынгу Трампа яго галоўны эканамічны дарадца Лары Кадлоў. — Я думаю, у другім паўгоддзі нас чакае салідны рост ВУП адсоткаў на 20, а беспрацоўе апусціцца ніжэй за 10%».
Энтузіязм Белага дома не падзяляе галоўны незалежны ацэншчык эканамічнай сітуацыі ў краіне — кіраўнік амерыканскага Цэнтрабанка Джером Паўэл.
«Выпуск тавараў і паслуг, роўна як і занятасць, застаюцца на ўзроўні значна ніжэй за дакрызісны, а з нагоды тэрмінаў і маштабаў аднаўлення існуе сур'ёзная нявызначанасць».
«Пакуль насельніцтва не паверыць, што з вірусам скончана, поўнае аднаўленне малаверагодна», — папярэдзіў ён кангрэсменаў.
Цяпер чытаюць
Малады работнік «Мінск-Арэны» павінен заплаціць 71 мільён даляраў4
Каментары