Пратэсты ў французскіх ліцэях пачаліся ў рэгіёне Іль-дэ-Франс вакол Парыжа, дзе былі зафіксаваныя выпадкі вандалізму і запускі феерверкаў у бок паліцыі.
З мінулага тыдня французскія падлеткі блакуюць школы і праводзяць дэманстрацыі ў знак пратэсту супраць цэлага шэрагу праблем, у тым ліку перапоўненых класаў, высокай вучэбнай нагрузкі і недахопу настаўнікаў, піша Бі-бі-сі.
Пратэсты ў французскіх ліцэях пачаліся ў рэгіёне Іль-дэ-Франс вакол Парыжа, дзе былі зафіксаваныя выпадкі вандалізму і запускі феерверкаў у бок паліцыі. У панядзелак пратэсты распаўсюдзіліся на іншыя рэгіёны: паводле звестак агенцтва AFP, чатыры ліцэі былі заблакаваныя ў паўднёвых рэгіёнах Прыморскія Альпы і Вар, а таксама паведамлялася пра пратэсты ў Марсэлі, у раёне Ліля на поўначы краіны і ў Седане ў паўночна-ўсходнім дэпартаменце Ардэны.
У панядзелак прэм’ер-міністр Францыі Себасцьен Лекарню заявіў, што любая эскалацыя пратэстаў у сярэдніх школах — гэта безадказна.
«Феерверкі, пажары, гвалт каля ліцэяў: нішто не апраўдвае стварэнне пагрозы для вучняў, персаналу або супрацоўнікаў паліцыі», — напісаў Лекарню ў X.
Ён рэзка раскрытыкаваў заклікі леварадыкальнай партыі «Непакорная Францыя» да пашырэння руху. «Гэтая эскалацыя безадказная», — заявіў ён, дадаўшы пры гэтым, што «праблемы сярэдніх школ павінны быць пачутыя і вырашаныя».
У адказ лідар партыі Жан-Люк Меланшон абвінаваціў урад Лекорню ў тым, што ён «аддаў загад аб падаўленні» пратэсту, дадаўшы, што старшакласнікі, якія ўдзельнічаюць у ім, былі «бясшкоднымі».
Міністр унутраных спраў Ларан Нуньес заявіў, што дэманстрацыі і блакады нельга лічыць тыповымі пратэснымі рухамі.
«Гэта значна больш падобна да вулічных беспарадкаў, у якіх удзельнічалі людзі ў масках, узброеныя феерверкамі ў трубках і метальнымі снарадамі, якія відавочна імкнуліся ўступіць у канфрантацыю з сіламі ўнутранай бяспекі, — сказаў ён. — Гаворка ішла не пра вылучэнне патрабаванняў, а пра сапраўдны гвалт у чыстым выглядзе».
Нуньес паведаміў журналістам, што ў панядзелак было затрымана 164 чалавекі і пацярпелі 180 школ.
Ён паведаміў, што ў панядзелак пацярпелі 12 супрацоўнікаў сілавых структур, 12 вучняў і трое супрацоўнікаў школ.
«Мы відавочна маем справу з гарадскім гвалтам, які спрабуе адвесці ўбок тое, што першапачаткова было класічным рухам старшакласнікаў, і ўнесці гвалтоўнае парушэнне ў працэс школьнай дэмакратыі», — заявіў у панядзелак увечары міністр адукацыі Эдуард Жэфрэ.
Каментары
Двухсэнсоўна для беларускага чытача: эскалацыя працуе без перабояў.