Чарговы хапун у Мінску. Міліцыя затрымала людзей, якія стаялі ў чарзе да крамы Symbal.by. МУС тлумачыць чаму
Чарговыя затрыманні ў Мінску — гэтым разам каля крамы Symbal.by, куды людзі прыйшлі купіць патрыятычную прадукцыю праз хуткае закрыццё крамы.
На вуліцы ўтварылася чарга, але неўзабаве прыехалі тры машыны міліцыі, у тым ліку аўтазак з АМАПам, куды без разбору пачалі кідаць людзей.
«Наша Ніва» звярнулася ў МУС з пытаннем, за што затрымліваюць людзей у чарзе.
«Людзі дастаўлены ў міліцыю для разбору ў мэтах спынення супрацьпраўнай дзейнасці, якая выказалася [вы бачылі, пэўна, па відэа] — яны заблакавалі машыну, зламалі люстэрка… Машына цывільная спрабавала выехаць», — сказала афіцыйны прадстаўнік мінскай міліцыі Наталля Ганусевіч.
Ганусевіч не адказала на пытанне «Нашай Нівы», як АМАП так хутка зразумеў, каго менавіта трэба затрымліваць за нібыта зламанае шкло — дзеянні АМАПа выглядалі абсалютна адвольнымі, яны хапалі ўсіх запар.
Відавочцы кажуць, што затрыманых дзясятак чалавек.
Разбор жа па такіх дробных скаргах у іншых абставінах ніколі не суправаджаецца масавымі затрыманнямі з дапамогай спецыяльных падраздзяленняў.
Мяркучы па фота і па прозвішчы, сярод затрыманых — Аляксандр Кузняцоў, студэнт-наватар Беларускага дзяржаўнага ўніверсітэта, які разам са сваімі сябрамі за ўласныя грошы на 3D-прынтарах запусціў друк дэталяў сродкаў індывідуальнай абароны і апаратаў штучнай вентыляцыі лёгкіх для медыкаў, якім неабходная была дапамога ў барацьбе з пандэміяй каранавіруса. Пра хлопца пісалі СМІ і сайт ягонага ўніверсітэта.
Вось фота: студэнта-трэцякурсніка механіка-матэматычнага факультэта вядуць двое ў чорным.
Цяпер чытаюць
«Я не прадугледзела толькі аднаго: што менавіта гэты кружочак выкарыстаюць супраць мяне». Споведзь Аліны Харысавай пасля скандалу з КДБ38
Каментары