Выдавецтва «Галіяфы» робіць вялікі святочны распродаж да 8 студзеня: 20% зніжкі на большасць кніг 2020 года. Выдаўцы прапануюць звярнуць увагу на каляндар і кнігі па папярэдняй замове, якія могуць быць цудоўным падарункам на святы.
«Там дзе нараджаецца снег»: паэтычны каляндар-2021
Паэтычны каляндар, «Там, дзе нараджаецца снег» — добры падарунак на Каляды і Новы Год. Святочны настрой і цудоўная паэзія.
Янаш «Ах, якая цудоўная краіна Панама»
«Калі ёсць сябра, тады няма чаго баяцца!» Мядзведзік і Тыгрык — блізкія сябры. І яны нічога не баяцца, таму што разам яны надзіва моцныя, моцныя, як мядзведзь і тыгр. У доме ля ракі ім добра жывецца. Але аднойчы яны выпраўляюцца ў дарогу на пошукі Панамы, краіны сваёй мары. У дарозе з імі здараюцца розныя прыгоды. Але дзе знаходзіцца Панама? Ліс, Карова, Мыш — яны нічога пра гэта не ведаюць, толькі Варона дапамагае сябрам. У рэшце рэшт яны знаходзяць тое, што шукалі…
Вольга Гапеева «Адна шкарпэтка і іншыя гісторыі»
Шэсць чароўных гісторый для дзяцей і не толькі. Дзівосныя насельнікі маленькага казачнага свету перажываюць тое, што знаёма шмат каму з нас — маленькіх і дарослых. Гэта мудрая і кранальная кніга пра вельмі важныя рэчы.
Аляксандр Лукашук «Вяртанне нацыяналіста«
Кнігу беларускага пісьменніка і публіцыста, дырэктара Беларускай службы Радыё Свабода Аляксандра Лукашука склалі дакументальныя даследаванні беларускай гісторыі XX стагоддзя. Тоўсты фаліянт змяшчае адразу пяць кніг, выдадзеных у розныя часы, пяць дакументальных даследаванняў савецкага перыяду гісторыі.
Алесь Гародня «Варта на Рэйне»
Легендарны твор Алеся Гародні пра Першую сусветную вайну «Варта на Рэйне», напісаны ў 1927 годзе. Аповесць у свой час высока ацэньвалі Максім Гарэцкі і Ян Скрыган. Твор напісаны наватарскім для таго часу «фельетонна-футурыстычным» стылем. Месцы, падзеі, людзі, словы, думкі, спадзяванні — усё быццам бы зліваецца ў адзін шалёны вір-калейдаскоп, імя якому — вайна.
Кніга выдадзена ў серыі «Святлацені», у якой выходзяць творы 1920-40 гг.
Аўтар — беларускі пісьменнік нямецка-рускага паходжання Алесь Гародня (Аляксандр Функ; 1899—1944), у сталінскія часы перажыў тры арышты і памёр у зняволенні.
Кніга змяшчае вялікую прадмову і каментары Віктара Жыбуля.
Усе кнігі выдавецтва «Галіяфы можна набыць па адрасе: Няміга, 3, цокальны паверх, бокс 47 альбо праз інтэрнэт-краму.
Каментары