У Бабруйску сваякі шукалі затрыманых у пятніцу людзей: іх не было ні ў ІЧУ, ні ў судзе
Сёння а 7:30 раніцы скончыўся тэрмін трохдзённага знаходжання пад вартай бабруйчан, якія былі затрыманыя ў пятніцу. Уcяго тады ў ІЧУ даставілі не менш за 15 чалавек, трох да вечара выпусцілі. У чым менавіта абвінавачваюць затрыманых, дагэтуль невядома. У іх кватэрах прайшлі ператрусы.
Раніцай 25 студзеня скончыўся тэрмін трохдзённага знаходжання затрыманых у ІЧУ, аднак на волю ніхто не выйшаў, піша Tut.by.
— Мы дзяжурым каля ІЧУ з 7-й раніцы, нікога не выпускалі. Але нам кажуць, што ўсе вызваленыя, — кажа мама аднаго з затрыманых.
Частка сваякоў дзяжурыць каля будынка суда на вуліцы Тухачэўскага, куды, як мяркуецца, павінны былі раніцай прывесці затрыманых. Аднак у суд нікога з іх таксама не даставілі.
Сваякі прынялі рашэнне пісаць заявы аб знікненні людзей.
— Я быў у кватэры дачкі падчас ператрусу, — распавядае Георгій Стрыгуноў. Ягоную дачку Алену затрымалі раніцай 22 студзеня. — Калі яе забіралі, нейкі маёр паведаміў, што яе апытаюць і адпусцяць. Ужо скончыўся 72 гадзіны з моманту затрымання, і я не ведаю, дзе яна.
Георгій Стрыгуноў кажа, што падчас ператрусу ў кватэры дачкі адзін з супрацоўнікаў міліцыі сказаў, што дачку затрымліваюць па справе аб абразе праваахоўнікаў. Але падрабязнасцяў ён не ведае.
Толькі пасля падачы заяў, каля 10:30, сваякам паведамілі, што затрыманыя яшчэ ў ІЧУ. Суды, хутчэй за ўсё, пройдуць там жа па відэасувязі.
Цяпер чытаюць
Пальчыс, Андрэева, Лойка і іншыя імёны — пасля візіту амерыканскіх дыпламатаў у Мінск вызвалілі партыю палітвязняў10
Каментары