Новы галоўны трэнер мужчынскай зборнай Беларусі па гандболе Юрый Шаўцоў павінен быць прадстаўлены журналістам 22 ліпеня.
На гэты дзень у Мінскай гарадской ратушы прызначана прэс‑канферэнцыя з удзелам Шаўцова і старшыні Беларускай федэрацыі гандбола Уладзіміра Канаплёва, паведаміў БелаПАН намеснік старшыні БФГ Іван Семяненя.
У мінулым сезоне нацыянальнай камандай кіраваў Георгій Свірыдзенка, які сумяшчаў гэтую пасаду з працай у нямецкім клубе «Дзюсельдорф». Зборная ўдзельнічала ў адборачным турніры чэмпіянату Еўропы 2010 года і не змагла прабіцца ў фінальную частку, заняўшы ў сваёй групе трэцяе месца пасля Германіі і Славеніі.
На прэс‑канферэнцыі 14 чэрвеня Уладзімір Канаплёў заявіў, што цяперашні склад мужчынскай зборнай Беларусі па гандболе не дазваляе «выходзіць спакойна або ў фінал чэмпіянату свету, або выконваць тыя задачы, якія пастаўлены дзяржавай і нам як федэрацыі па ўдзеле ў Алімпійскіх гульнях 2012 года».
«Агульная бяда ўсіх трэнераў як мужчынскіх каманд, так і жаночых, — гэта дрэнная псіхалагічная падрыхтоўка», — заявіў Канаплёў.У той жа час ён адзначыў: «У нас трэнерскі склад цяпер такі, што я ні Свірыдзенку, ні Маліноўскаму, ні Бразінскаму не магу ніякіх прэтэнзій прад’явіць, таму што людзі стараюцца».
***
Юрый Шаўцоў, якому ў снежні споўніцца 50 гадоў, з’яўляецца алімпійскім чэмпіёнам (1988) і чэмпіёнам свету (1982), шасціразовым чэмпіёнам СССР, трохкратным уладальнікам Кубка еўрапейскіх чэмпіёнаў і двухразовым уладальнікам Кубка кубкаў, уладальнікам Суперкубка (у складзе мінскага СКА). Паспяхова працаваў у клубах нямецкай бундэслігі.
У 2005 годзе ў інтэрв’ю газеце «Прессбол» Шаўцоў заявіў: «Ніколі не пакідала думка, што яшчэ давядзецца пасядзець на лаўцы нацыянальнай зборнай Беларусі. Не буду толькі загадваць, калі для гэтага саспею».
Каментары