Міліцыя будзе рэкламаваць жыццё ў Беларусі, каб да нас прыехала больш замежнікаў
Урад прыняў дзяржаўную праграму аб забеспячэнні правапарадку на бліжэйшыя пяць год. Ёсць там адгалінаванне і па міграцыі. Як адзначаюць улады, апошнім часам назіраецца скарачэнне міграцыйнага прыроста: з’язджаць з краіны стала больш, а прыязджаць — менш. Але ў міліцыі не губляюць аптымізму: да 2025 года разлічваюць атрымаць міграцыйны прырост на 20 тысяч чалавек. Кажуць, трэба рэкламаваць жыццё ў Беларусі за мяжой, каб жадаючых пераехаць да нас было больш.
Па афіцыйных дадзеных, з 2020 года назіраецца павелічэнне колькасці грамадзян Беларусі, якія з’язджаюць за мяжу і застаюцца там. У міліцыі называюць дзве прычыны: попыт на беларускіх спецыялістаў і стабілізацыю абстаноўкі ва Украіне, куды вярнуліся ўкраінцы, якія некалькі апошніх год жылі ў Беларусі, адпаведна, і новых украінцаў у нас не паболела.
Чаму замежнікі прыязджаюць у Беларусь? Уз’яднанне сям’і, рэпатрыяцыя этнічных беларусаў і, вы не паверыце, для пражывання ў краіне «са стабільнай эканомікай, палітычнай сітуацыяй, а таксама дастаткова высокім узроўнем жыцця ў параўнанні з іншымі краінамі СНД».
У 2020 годзе ў параўнанні з 2019-м скарацілася колькасць замежных грамадзян, якія прыязджаюць у Беларусь на працу. У асноўным гэта былі рабочыя з Расіі, Кітая, Украіны і Узбекістана. Беларусы ж часцей за ўсё выязджаюць на працу ў Польшчу, Літву і Расію.
Як міграцыйныя ўлады плануюць вырашаць праблему? Выдаваць дазволы на сталае пражыванне замежнікам, якія маюць падставы для набыцця тут грамадзянства, таксама па спрошчаным парадку выдаваць грамадзянства беларусам, якія раней пражывалі ў краіне або нарадзіліся тут, даваць міграцыйныя льготы замежным студэнтам і выпускнікам, якія вучыліся ў Беларусі, і высокакваліфікаваным работнікам, а яшчэ кампенсаваць замежнікам расходы на пераезд у Беларусь і першапачатковае ўладкаванне (на гэта з бюджэту выдзяляць 383 840 рублёў).
І самая цікавая прапанова ад уладаў — правядзенне інфармацыйнай кампаніі за мяжой, Беларусь будуць рэкламаваць як краіну для працы і жыцця. Да 2025 года ўлады разлічваюць атрымаць міграцыйны прырост у 20 тысяч чалавек.
Як пандэмія змяніла міграцыю ва Усходняй Еўропе ў адваротны бок
Беларусы збіраюць подпісы супраць забароны на выезд з краіны
Цяпер чытаюць
Лукашэнка: Што творыцца ў краіне, у нас усе гэтую гусь круцяць22
Лукашэнка: Што творыцца ў краіне, у нас усе гэтую гусь круцяць
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5757
Каментары