Украіна абвясціла ў вышук 43‑гадовага гамельчука Яўгена Малінковіча. Яму выставілі абвінавачванні паводле некалькіх крымінальных артыкулаў, у тым ліку за парушэнне міжнародных правіл гандлю таварамі падвойнага прызначэння і дапамогу краіне-агрэсару ў складзе групы па папярэдняй змове, паведаміла «Радыё Свабода». Выданне «Флагшток» сабрала, што пра гэтага чалавека вядома.
Чарнігаўская абласная пракуратура раней апублікавала позву Малінковічу, зарэгістраванаму на вуліцы Ірынінскай у Гомелі. Яго выклікалі ў следчы аддзел абласнога ўпраўлення СБУ ў якасці падазраванага.
Расследаванне справы праводзілася завочна, а цяпер матэрыялы перадалі ў суд. Гамельчуку прызначылі адваката. Абаронца выступіў супраць завочнага арышту, заявіўшы, што следства парушыла працэдуру паведамлення Малінковічу пра выстаўленае падазрэнне. Суд гэтую скаргу не задаволіў.
Паводле інфармацыі следства, Малінковіч арганізоўваў пастаўкі з Украіны праз Польшчу ў Расію аптычнага шкла для разанскага ТАА «КОЛТ», якое выконвае заказы для расійскай вайсковай прамысловасці. Прадукцыю ў Польшчу перавозілі грамадзяне Украіны. Следчыя зафіксавалі некалькі такіх перавозак, але іх агульны аб'ём не раскрываецца.
Украінскія ўдзельнікі схемы падчас расследавання называлі Малінковіча «Жэнем з Гомеля».
Гаворка ішла пра шкло з маркіроўкай «МС23», «БК-110» і «ТК-114». Паводле экспертаў, такія віды шкла выкарыстоўваюцца ў Расіі пры вытворчасці вайсковых прыбораў. Калі віну гамельчука дакажуць, яму можа пагражаць да 12 гадоў пазбаўлення волі.
Малінковіч скончыў Гомельскі дзяржаўны ўніверсітэт імя Францыска Скарыны. З 2005 па 2020 год ён працаваў на кандытарскай фабрыцы «Спартак», дзе прайшоў шлях ад таваразнаўца да менеджара.
У 2021 і як мінімум у 2022 годзе Малінковіч працаваў у гомельскім ТАА «Будэнергасэрвіс-Плюс», якое займаецца агульным будаўніцтвам і будаўніча-мантажнымі работамі.
Пасля гэтага звесткі пра яго практычна знікаюць. У інтэрнэце не знайшлося свежых згадак пра Малінковіча, а ў сацыяльных сетках захаваліся толькі яго старыя старонкі. Таксама была знойдзена, верагодна, актуальная старонка з закрытым профілем, якая вядзецца пад іншымі данымі.
У якой краіне цяпер знаходзіцца Яўген Малінковіч, невядома.
Стральба паміж ГУР і СБУ. Хто стаў прычынай канфлікту?
Двое беларусаў, якія мелі сувязі з расійскай вайсковай прамысловасцю, прызналі сваю віну ў Літве
Беларускі добраахвотнік Жэрар расказаў сваю версію справы, якую завялі на яго ва Украіне
Ва Украіне расследуюць справу злачыннай арганізацыі з удзелам дэпутатаў і высокапастаўленых асоб адміністрацыі прэзідэнта
Яшчэ адзін суд у Кіеве адмовіўся разглядаць справу затрыманай па падазрэнні ў шпіянажы журналісткі Кардаш
Каментары