Улады ліквідуюць адзіную афіцыйна зарэгістраваную рэгіянальную арганізацыю праваабаронцаў
Улады ліквідуюць «Магілёўскі праваабарончы цэнтр» — адзіную ў Беларусі афіцыйна зарэгістраваную рэгіянальную арганізацыю праваабаронцаў.
Суд па справе адбудзецца 17 лютага ў 14:30. Яшчэ ў студзені ў сябраў «Магілёўскага праваабарончага цэнтра» адбыліся ператрусы, перадае «Радыё Рацыя».
25 студзеня супрацоўнікі Дэпартамента фінансавых расследаванняў КДК РБ правялі ператрус у дырэктара Магілёўскага праваабарончага цэнтра Уладзіміра Краўчанкі. У выніку ператрусу службоўцы забралі ў праваабаронцы цацачны пісталет сына і старыя буклеты Беларускага Хельсінкскага камітэта 10-гадовай даўніны.
Пастанова на ператрус была выпісаная цэнтральным апаратам Следчага камітэта і санкцыянаваная намеснікам генеральнага пракурора.
26 студзеня ў Краўчанкі прайшоў яшчэ адзін вобшук, у выніку якога канфіскавалі ноўтбук.
Магілёўскі праваабарончы цэнтр на працягу больш чым 20 гадоў актыўна дзейнічае ў Магілёўскай вобласці. За гэтыя гады арганізацыя неаднаразова трапляла пад пільную ўвагу мясцовых органаў улады, незадаволеных крытыкай праваабаронцаў у свой адрас.
Цяпер чытаюць
«Я не прадугледзела толькі аднаго: што менавіта гэты кружочак выкарыстаюць супраць мяне». Споведзь Аліны Харысавай пасля скандалу з КДБ44
Каментары