Прадстаўнікі батальёна Кастуся Каліноўскага агучылі колькасць беларусаў, якія знаходзяцца на тэрыторыі марыупальскага завода «Азоўсталь». Верагодна, на гэты момант не меней за 5 нашых суайчыннікаў абараняюць акружаны расійскімі вайскоўцамі завод. Пра гэта паведамілі ў прамым эфіры «Белсата» прадстаўнікі беларускага вайсковага фармавання.
Прадстаўнікі беларускага батальёна распавялі, што апошні раз сувязь з байцамі была 4 дні таму.
«Яны ўдала ваююць і не толькі трымаюць абарону, але яшчэ і робяць вылазкі насустрач ворагу. Гэта не проста пазіцыйная вайна, але адбываецца тактычная вайна, каб на вуліцах горада нават знішчаць ворагаў», — паведаміў прадстаўнік батальёна Ян Мельнікаў.
Вайскоўцы адзначаюць, што сітуацыя ў Марыупалі застаецца цяжкай. У абаронцаў «Азоўсталі» заканчваецца ўзбраенне, ежа і пітная вада.
Вайскоўцы паведамляюць, што амаль 80% абаронцаў параненыя, мала спяць і пры тым удала вядуць абарону і нават робяць контрнаступы.
«Тое, што афіцыйна распавядаюць — цяпер на заводзе больш за 500 параненых і сярод іх большасць з раненнямі вядуць абарону «Азоўсталі». Нават калі заканчваліся медыкаменты для цывільных, то вайскоўцы аддавалі ім свае. Тое самае можна сказаць і пра складанае становішча з вадой і ежай. Праблема вялікая і рэсурс амаль вычарпаны. Лічаныя дні засталіся», — дадаў Ян Мельнікаў.
Беларускія вайскоўцы адзначаюць, што сітуацыя ў Марыупалі патавая і казаць пра дэблакаду цяпер немагчыма, бо пакуль ва Украіне не хапае неабходнай артылерыі і СПА.
Складанасць і ў тым, што горад знаходзіцца недалёка ад мяжы з Расіяй, Чорнае мора застаецца заблакаваным для падтрымкі.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары