Новы тэрмін ад самай «рэпрэсіўнай» суддзі Брэста: Вера Філонік дала маладой маці 4 гады «хатняй хіміі» за відэа з вайсковай тэхнікай
9 чэрвеня Брэсцкі абласны суд вынес рашэнне па справе Вольгі Буян, якую абвінавачваюць у «садзейнічанні экстрэмісцкай дзейнасці» па ч. 1 арт. 361-4 КК.
Судовае пасяджэнне ўзначаліла Вера Філонік — адна з самых «рэпрэсіўных» суддзяў не толькі ў рэгіёне, але і ў краіне, якая вельмі хутка зрабіла сваю кар'еру. Толькі за год, са жніўня 2020-га па кастрычнік 2021-га, суддзя, якой крыху больш за 30 гадоў, вынесла каля 40 «палітычных» прысудаў, жорстка пакараўшы беларусаў за іх грамадзянскую пазіцыю. Філонік судзіла людзей цэлымі групамі і ўдзельнічала ў самых гучных справах рэгіёна: «Брэсцкія беспарадкі», «Пінская справа», «Справа карагодаў», паведамляе «Вясна»…
Справа Вольгі Буян, якую суддзя разглядала гэтым разам, таксама «палітычная».
Вядома, што абвінавачанай 27 гадоў. Жанчына жыве ў пасёлку Рэчыца Столінскага раёна, у 7 км ад беларуска-ўкраінскай мяжы, і выхоўвае маленькае дзіця.
21 сакавіка 2022 года Вольга адводзіла дзіця ў садок. Па дарозе ўбачыла вайсковую расійскую тэхніку з апазнавальнымі выявамі, зняла яе на відэа і адправіла ў тэлеграм-бот праекта «Беларускі Гаюн».
Пазней беларускія ўлады прызналі «Беларускі Гаюн» экстрэмісцкім фармаваннем.
Як стала вядома падчас судовага пасяджэння, пасля таго, як Вольга адправіла відэа з ваеннай тэхнікай у тэлеграм-бот, сілавікі пачалі яе высочваць. Асобу жанчыны высветлілі па відэакамерах, якія былі ўсталяваныя на чыгуначным пераездзе.
Відэа, якое зняла Вольга, з'явілася на канале «Беларускі Гаюн» у 11.32. Па ім было зразумела, што здымка вялася з машыны. Па часе здымкі сілавікі вызначылі машыну жанчыны. Неўзабаве Вольгу затрымалі і запісалі з ёй «пакаяннае відэа».
Сваю віну падчас суда абвінавачаная цалкам прызнала. Пракурорка Вольга Грыцкевіч запрасіла для Вольгі Буян абмежаванне волі тэрмінам на 4 гады.
Суд прызначыў пакаранне ў выглядзе абмежавання волі без накіравання ў папраўчую ўстанову тэрмінам на 4 гады. Мабільны тэлефон абвінавачанай, як сродак здзяйснення злачынства, суд канфіскаваў.
Прысуд не ўступіў у законную сілу і можа быць абскарджаны і апратэставаны ў апеляцыйным парадку.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда11
Каментары