«Вельмі-вельмі абмежавана»: у Кіеве расказалі пра дыпламатычную камунікацыю з Беларуссю
Міністр замежных спраў Украіны Дзмітрый Кулеба заявіў, што адзіным каналам камунікацыі Кіева і Мінска з'яўляюцца дыпламатычныя прадстаўніцтвы краін.
«У нас ёсць пасол у Беларусі, у нас ёсць амбасада ў Беларусі. У іх ёсць амбасада ў Кіеве. Гэта адзіныя каналы зносін. То бок вельмі суха-афіцыйна, але калі вы думаеце, што там штодня разрываецца паштовая скрынка ад камунікацыі, то гэта не так. Гэта вельмі-вельмі абмежаваныя кантакты», — сказаў Дзмітрый Кулеба ў інтэрв'ю ўкраінскаму выданню LB.ua.
Адказваючы на пытанне журналіста аб магчымым непасрэдным удзеле Беларусі ў вайне з Украінай, міністр нагадаў, што Расія ўжо выкарыстоўвае беларускую тэрыторыю.
«Калі гаворка пра беларускую армію, мяркую, што гэтыя рызыкі будуць павялічвацца прапарцыйна магчымым поспехам расійскай арміі на тэрыторыі Украіны. Да таго часу, пакуль беларуская армія будзе дакладна разумець, што Узброеныя сілы Украіны здольныя ім сур’ёзна «наваляць», яны будуць усяляк адтэрміноўваць свой заход. Станам на сёння яны гэта дакладна ўсведамляюць», — патлумачыў Кулеба.
Украіна за час расійскай вайны і абстрэлаў з тэрыторыі Беларусі не накіравала адпаведнай дыпламатычнай ноты з просьбай патлумачыць сітуацыю. Скарачэнне колькасці дыпламатычнага персаналу Украіны ў Беларусі стала нагодай адзінага за ўвесь час вайны афіцыйнага пратэсту, з нагоды якога ў беларускае МЗС Кіеў адправіў ноту.
У заяве, з якой Міністэрства замежных спраў Украіны выступіла 25 лютага аб агрэсіі Расіі, Беларусь згадвалася ў шэрагу пералічэння кірункаў, з якіх адбылася атака расійскіх войскаў. Украінскія дыпламаты заклікалі краіны Захаду ўвесці санкцыі супраць Расіі і дапамагчы зброяй для больш эфектыўнай барацьбы з расійскай агрэсіяй.
У некалькіх краінах Еўропы 25 лютага выклікалі беларускіх амбасадараў у нацыянальныя МЗС праз тое, што Беларусь дапамагае расійскай агрэсіі.
Дагэтуль Беларусь і Украіна маюць дыпламатычныя дачыненні, хаця беларускія дыпламаты амаль у поўным складзе на чале з амбасадарам Ігарам Сокалам выехалі з Украіны.
У Беларусі ўкраінская амбасада працягвае працаваць і дапамагаць украінскім грамадзянам, якія выехалі ў Беларусь добраахвотна альбо іх незаконна вывезлі расійскія войскі пры адыходзе з памежных з Беларуссю абласцей Украіны.
Цяпер чытаюць
Андрэя Пачобута памянялі на лукашэнкаўскіх шпіёнаў, арыштаваных у Польшчы44
Каментары