Суд Ленінскага раёна Гродна асудзіў да чатырох з паловай гадоў калоніі ва ўмовах узмоцненага рэжыму 33-гадовага бухгалтара Аляксандра Францкевіча. Гродзенца абвінавацілі па сямі артыкулах Крымінальнага кодэкса — абразы прадстаўнікоў улады, Лукашэнкі, суддзяў, пагрозы супрацоўнікам міліцыі і суддзям і па іншых фактах. Следчы камітэт называе яго актыўным удзельнікам дэструктыўных тэлеграм-каналаў і прадстаўніком «канапавых войскаў», піша «Вясна».
Паводле версіі абвінавачвання, 33-гадовы жыхар Гродна размяшчаў у Telegram-каналах паведамленні з абразамі прадстаўнікоў улады і іх блізкіх, у тым ліку вышэйшых службовых асоб. Таксама ён нібыта выказваў пагрозы гвалтам у дачыненні да супрацоўнікаў праваахоўнай і судовай сістэмы, прыніжаў іх гонар і годнасць. Судзілі Аляксандра па 35 каментарах, пацярпелымі былі прызнаныя 26 чалавек.
Крымінальную справу разглядаў суддзя Руслан Гурын. Францкевіч да суда ўтрымліваўся пад вартай.
Абвінавачаны сваю віну прызнаў часткова. На допыце расказаў, што ні з кім з пацярпелых асабіста не знаёмы, аднак пад уплывам «дэструктыўных рэсурсаў» адчуваў непрыязнасць да службовых асоб.
Каментары