З'явілася першае ў свеце шампанскае, якое можна піць у бязважкасці
Французская вінаробня GH Mumm праз пяць гадоў распрацоўкі і тэстаў прадставіла першае ў свеце шампанскае, якое можна піць у бязважкасці. Бутэлька пеністага напою Mumm Cordon Rouge Stellar адправіцца на Міжнародную касмічную станцыю ў 2023 годзе разам з экіпажам Axiom Space, піша Daily mail.
У гэтым шампанскім прысутнічаюць ноткі саспелых жоўтых пладоў, персіка, сухафруктаў, ляснога арэха і праліне, адценні ванілі і выпечкі. Віно цалкам адпавядае патрабаванням французскага Нацыянальнага цэнтра касмічных даследаванняў. Цана, па якой будзе прадавацца напой, яшчэ не вызначаная.
Бутэлька Mumm Cordon Rouge Stellar пакрытая ахоўным слоем з авіяцыйнага алюмінія. Корак утрымлівае спецыяльны клапан з нержавеючай сталі. Пры націсканні ён выпускае шарык шампанскага.
Напой выходзіць з бутэлькі ў выглядзе пены. Яго можна злавіць у бязважкасці ў невялікі келіх на доўгай ножцы — ён падобны на пашотніцу для яек.
Вінаробня тэставала шампанскае падчас парабалічнага палёту на Airbus. Выпрабаванні прайшлі паспяхова. Стваральнікі прадукта спадзяюцца, што віно дапаможа астранаўтам і касмічным турыстам адчуць смак свецкага жыцця нават удалечыні ад зямлі.
Цяпер чытаюць
Беларускі кладаўшчык са свастыкай на плячы лячыўся ад алкагалізму ў Сібіры і пайшоў ваяваць за Расію, а застаўся без выплат і працы10
Каментары