69-гадовую пенсіянерку з Мёраў судзяць у закрытым рэжыме. Яе трымалі амаль год за кратамі
У судзе Мёрскага раёна 10 лістапада ў закрытым рэжыме пачаўся суд над 69-гадовай былой настаўніцай беларускай мовы і літаратуры з Міёраў Эмай Сцепулёнак. Пенсіянерку ўтрымлівалі за кратамі амаль год. У сярэдзіне верасня жанчыне змянілі меру стрымання і перавялі на хатні арышт.
Эму Сцепулёнак затрымалі 29 верасня 2021 года ў межах крымінальнай справы, заведзенай за каментары ў інтэрнэце пасля гібелі супрацоўніка КДБ Дзмітрыя Федасюка і it-спецыяліста Андрэя Зельцэра, піша «Вясна».
Першыя два месяцы жанчыну ўтрымлівалі ў жодзінскай турме №8, а потым перавялі ў віцебскі СІЗА №2. Нягледзячы на тое, што ў Жодзіна фігуранты «справы Зельцэра» знаходзіліся ў нечалавечых умовах, Сцепулёнак у лістах пісала, што ў Віцебску да яе ставіліся яшчэ горш. Ёй нават не аказвалі медыцынскую дапамогу.
Жанчына не мае ў Беларусі ані сваякоў, ані сяброў, але неабыякавыя людзі не пакінулі яе сам-насам з рэпрэсіямі, таму ўвесь час дапамагалі ёй. За час у зняволенні ў яе пагоршылася здароўе і сапсаваўся зрок. У сярэдзіне верасня жанчыне змянілі меру стрымання і перавялі на хатні арышт. 7 лістапада Эма Антонаўна адзначыла 69-годдзе дома.
Спачатку паведамлялася, што яе вінавацяць паводле артыкулаў 369 і 130 Крымінальнага кодэкса, але цяпер яе судзяць за абразу Лукашэнкі (артыкул 368 Крымінальнага кодэкса) і за абразу прадстаўніка ўлады (артыкул 369 Крымінальнага кодэкса).
Судовы працэс пачаўся 10 лістапада ў судзе Мёрскага раёна. Справу пенсіянеркі ў закрытым рэжыме разглядае суддзя Ірына Яскевіч.
Цяпер чытаюць
Хто забараняе ў Беларусі кнігі — вось гэтыя 22 чалавекі32
Хто забараняе ў Беларусі кнігі — вось гэтыя 22 чалавекі
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары