Паводле інфармацыі камандавання Узброеных сіл Украіны, абстаноўка пад Бахмутам, які цягам апошніх месяцаў спрабуюць захапіць расійскія войскі, становіцца ўсё больш напружанай. Расіяне не пакідаюць спроб узяць горад у кола, нягледзячы на каласальныя людскія страты, паведаміў у аўторак кіраўнік украінскіх сухапутных войскаў, генерал-палкоўнік Аляксандр Сырскі.
Паводле яго слоў, на перадавой там змагаюцца найбольш падрыхтаваныя штурмавыя атрады «Вагнера», якія спрабуюць прарваць абарону ўкраінскіх войскаў і акружыць горад.
У ноч на аўторак цяжкае становішча на бахмуцкім кірунку прызнаў і прэзідэнт Украіны Уладзімір Зяленскі.
«Праціўнік пастаянна знішчае ўсё, што можна выкарыстоўваць для абароны нашых пазіцый, каб замацавацца і забяспечыць абарону», — заявіў Уладзімір Зяленскі
Пры гэтым актыўнасць расійскага наступу не зніжаецца. Са слоў намесніка міністра абароны Украіны Ганны Маляр, расійскае камандаванне павялічвае інтэнсіўнасць нападаў, выкарыстоўваючы тактыку татальнага знясілення і татальнага знішчэння.
Падобная тактыка абыходзіцца расіянам нятанна: па падліках украінскага боку, штодня атакуючыя сілы губляюць пад Бахмутам ад 600 да 1000 чалавек. Падобныя ацэнкі прыводзяць і заходнія аналітыкі.
У дадатак да гэтага з набліжэннем вясны змёрзлы грунт пачынае раставаць і ператвараецца ў бруд, дзе неадкладна пачынае ўвязаць вайсковая тэхніка. Перасоўвацца ў такіх умовах браніраванымі калонамі практычна немагчыма, так што, паводле ацэнак экспертаў, у бліжэйшыя некалькі тыдняў лінія фронту мае шанцы некалькі стабілізавацца.
Цяпер чытаюць
У расійскай арміі беларускага наёмніка павесілі на дрэве ўніз галавой і білі палкай па геніталіях4
Каментары