«Яны былі неймаверна ветлівыя. Тлумачылі, што нам усё даравалі». «Вяртальшчыкі» прыходзілі да родных былога вайскоўца
Афіцэр запасу з Гомеля Аляксандр Пануца, які з’ехаў з краіны пасля пратэстаў 2020 года, распавёў пра візіт невядомых у цывільным да яго цешчы, якая пражывае ў яго кватэры, піша «Штодзень».
«Яны былі неймаверна ветлівыя. Тлумачылі, што нам усё даравалі. Маўляў, скажыце дзецям, каб яны вярталіся, вам тут цяжка без іх. Ну, пасядзіць годзік, нічога. Ні ордара, ні пратакола… Кажуць, прыйшлі пагаварыць.
Потым стаялі хвілін 10 на лесвічнай пляцоўцы, тэлефанавалі камусьці, раіліся…» — распавёў пра акалічнасці дзіўнаватага візіту Аляксандр Пануца.
Былы вайсковец хвалюецца, каб невядомыя «не падкінулі чаго», каб потым ціснуць на яго праз сваякоў.
Аляксандр Пануца ў шчырасць намераў улады адносна «даравання віны» апанентам улады не верыць. Ён лічыць, што сілавікі хочуць любымі спосабамі арганізаваць паказальныя працэсы над вайскоўцамі, якія выступаюць супраць вайны ва Украіне.
«Я цалкам разумею, што яны спрабуюць выцягнуць мяне ў Беларусь і паказальна пакараць. Больш за тое, я выдатна падыходжу пад смяротнае пакаранне, якое прадугледжанае ў нядаўнім законе. Ваенны, хай і ў запасе, чатыры «народныя артыкулы» за апазіцыйную дзейнасць, а «здраду радзіме», як высветлілася, яны могуць «прышыць» і трохгадоваму дзіцяці.
Нічога дзіўнага для краіны, дзе чалавек утрымлівае ўладу амаль траціну стагоддзя, і адкрыта кажа, што цяпер не да законаў. Натуральна, вярнуцца на радзіму я не магу, хоць і вельмі хацеў бы, сумую па людзях, прыродзе, блізкіх… Але, на жаль, дарогі ў Беларусь мне больш ніколі не будзе, артыкулы, якія мне інкрымінуюць, не маюць тэрміна даўніны», — падсумоўвае вайсковец.
Аляксандр Пануца — афіцэр запасу з Гомеля, які з’ехаў з Беларусі пасля пратэстаў 2020 года. У лютым 2022 года яго зварот да беларускіх вайскоўцаў пачыталі і паглядзелі тысячы чалавек.
У верасні 2022 года яго пазбавілі звання разам з дзясяткамі іншых вайскоўцаў, якія не падтрымліваюць рэжым Аляксандра Лукашэнкі.
Цяпер чытаюць
Хто забараняе ў Беларусі кнігі — вось гэтыя 22 чалавекі16
Хто забараняе ў Беларусі кнігі — вось гэтыя 22 чалавекі
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары