Кіраўнікі Мінабароны РФ і Беларусі падпісалі дакументы наконт нестратэгічнай ядзернай зброі РФ на тэрыторыі Беларусі. Кнопка будзе толькі ў Расіі

У Мінску адбылася двухбаковая сустрэча міністра абароны Беларусі Віктара Хрэніна і міністра абароны Расіі Сяргея Шайгу. Кіраўнікі ваенных ведамстваў абмеркавалі ваенна-палітычную абстаноўку і пытанні ваенна-тэхнічнага супрацоўніцтва паміж абароннымі ведамствамі, а таксама падпісалі дакументы, якія вызначаюць парадак утрымання расійскай нестратэгічнай ядзернай зброі ў спецыяльным сховішчы на тэрыторыі Рэспублікі Беларусь, як паведаміла прэс-служба Мінабароны.

«Размяшчэнне нестратэгічнай ядзернай зброі — дзейсны адказ на агрэсіўную палітыку недружалюбных нам краін», — заявіў міністр абароны Беларусі Віктар Хрэнін падчас сустрэчы з Шайгу.

Паводле яго, для забеспячэння ваеннай бяспекі, у тым ліку абароны заходніх межаў Саюзнай дзяржавы ў Рэспубліцы Беларусь пільная ўвага надаецца пытанням гатоўнасці і здольнасці Узброеных Сіл выканаць задачы па прызначэнні.

У рамках ваеннага і ваенна-тэхнічнага супрацоўніцтва паміж краінамі прынятыя меры па нарошчванні баявога патэнцыялу рэгіянальнай групоўкі войскаў, у тым ліку па аснашчэнні новымі сучаснымі ўзорамі ўзбраення, такімі як аператыўна-тактычны ракетны комплекс «Іскандэр-М», зенітная ракетная сістэма С-400, паведаміў міністр.

Праведзена пераабсталяванне самалётаў Су-25 з магчымасцю прымянення авіяцыйных сродкаў паражэння ў ядзерным абсталяванні. Вайскоўцы Рэспублікі Беларусь прайшлі навучанне на палігонах Расійскай Федэрацыі і атрымалі практычныя навыкі ў іх эксплуатацыі, як гаворыцца ў паведамленні.

Згодна з заяваю Хрэніна, «ва ўмовах невыканання гарантый бяспекі, дадзеных Рэспубліцы Беларусь у Будапешцкім мемарандуме 5 снежня 1994 года, а таксама бесперапыннай ваяўнічай рыторыкі, падмацаванай практычнымі дзеяннямі ў дачыненні да Рэспублікі Беларусь і Расійскай Федэрацыі з боку краін «калектыўнага» Захаду, па даручэнні кіраўнікоў нашых дзяржаў арганізаваная работа па размяшчэнні на тэрыторыі Рэспублікі Беларусь нестратэгічнай ядзернай зброі Расійскай Федэрацыі». 

Расія, размяшчаючы нестратэгічную ядзерную зброю на тэрыторыі Беларусі, не перадае яго Беларусі, кантроль над ім і рашэнне аб прымяненні застаецца за Масквой, пра гэта заявіў міністр абароны РФ Сяргей Шайгу.

Сёння міністр абароны Расіі прыляцеў у Мінск. Тут адбудзецца пасяджэнне Савета міністраў абароны АДКБ.

Пра тое, што Расія размесціць у Беларусі ядзерную зброю, прэзідэнт Расіі Уладзімір Пуцін заявіў у сакавіку. Паводле яго, адбылося гэта па просьбе Лукашэнкі. Фактычна ж Беларусь паставілі перад гэтым фактам. 

Прапагандысты сцвярджалі, што кантроль над выкарыстаннем зброі будзе і ў Беларусі. Генеральны сакратар СНД Сяргей Лебедзеў таксама заяўляў, што «будзе двайная кнопка» — рашэнне аб прымяненні ядзернай зброі Беларусь і РФ будуць прымаць сумесна. Цяпер гэта пытанне закрытае. 

Краіны НАТА, ЕС, ЗША асудзілі гэта рашэнне Расіі наконт размяшчэння тактычнай ядзернай зброі ў Беларусі. 

Украінскае МЗС заклікала беларусаў не дапусціць размяшчэння расійскай ядзернай зброі. 

Нават Кітай выпусціў каментар. Ядзерная вайна ніколі не павінна быць развязаная, бакі павінны засяродзіцца на дыпламатычным рашэнні ўкраінскага крызісу, як заявіла на брыфінгу ў панядзелак афіцыйная прадстаўніца МЗС КНР Маа Нін, каментуючы рашэнне Расіі аб размяшчэнні ў Беларусі тактычнай ядзернай зброі.

ЗША неаднойчы заяўлялі, што пакуль не бачаць прыкмет перакідання ядзернай зброі ў Беларусь. 

Дзе размесціцца сховішча для ядзернай зброі, пакуль не паведамлялася. 

• 0
• 1
• 0
• 1
• 37