«Патокі вады нясуць целы загінулых жывёл». Украінскі палітык апісвае сітуацыю на Херсоншчыне
Дэпутат Вярхоўнай Рады Украіны Аляксей Ганчарэнка на ўласныя вочы пабачыў наступствы катастрофы, выкліканай падрывам расіянамі дамбы Кахоўскай ГЭС.
«У Херсоне вада ўсё прыбывае. Мы не ведаем, на якім узроўні яна спыніцца», — кажа дэпутат.
У гутарцы з «Нашай Нівай» Ганчарэнка адзначае, што людзей з затопленых раёнаў эвакуююць, але многія яшчэ застаюцца ў небяспецы. Сваё жытло яны вымушаныя пакінуць, бо яно ў вадзе.
«На правым беразе Дняпра, які кантралюе Украіна, эвакуацыя арганізаваная. Падвозіцца пітная вада. Сітуацыя складаная, але пад кантролем. На левым беразе Расія пляваць хацела на людзей. Эвакуацыяй і дапамогаю там ніхто не займаецца», — дзеліцца сваім бачаннем палітык.
Украінскія ўлады вывозяць людзей у бяспечныя раёны. У сацыяльных сетках мноства паведамленняў аб гатоўнасці прыняць эвакуяваных. Размяшчэннем займаюцца і «Ганчарэнка цэнтры» (недзяржаўная сетка культурна-валанцёрскіх прастор), якія месцяцца ў суседнім з Херсонам Мікалаеве, а таксама Адэсе.
Аляксей Ганчарэнка кажа, што цяпер улады заклапочаныя тым, каб зменшыць маштаб доўгатэрміновых наступстваў ад катастрофы для экалогіі. Існуе імавернасць эпідэміі.
Па Херсоншчыне да Чорнага мора забруджаныя патокі вады нясуць целы загінулых жывёл. У ваду выліліся тоны алівы з Кахоўскай ГЭС.
«Цяпер лета, якое паскарае гніенне цел загінулых жывёл і, магчыма, людзей. Багата знесла бруду ў раку. Таму рызыка эпідэміі хваробаў дужа высокая», — прагназуе Аляксей Ганчарэнка.
Расіяне ўзарвалі запруду на Дняпры 6 чэрвеня. Выбух адбыўся ў машыннай зале Кахоўскай ГЭС, якая, мяркуецца, аднаўленню не падлягае.
Паводле апошніх звестак Абласной ваеннай адміністрацыі, на той частцы Херсоншчыны, якая кантралюецца ўзброенымі сіламі Украіны, затопленыя дзясяткі паселішчаў.
У самім Херсоне пад вадою больш за 1800 будынкаў. Узровень вады ў горадзе сягае больш чым на 5 метраў. Пік затаплення яшчэ не надышоў. Прагназуецца, што ў найбліжэйшыя гадзіны ўзровень вады стабілізуецца.
«Наша Нiва» — бастыён беларушчыны
ПАДТРЫМАЦЬГлядзіце таксама:
«Гэта злачынна і безразважна»: генеральны сакратар Рады Еўропы асудзіла падрыў Кахоўскай ГЭС
«Не хапала сілы». Залужны згадаў, што давяло яго да слёз з пачатку расійскага ўварвання
-
Расія цяпер не трымае на тэрыторыі Беларусі вялікіх вайсковых сіл — Дзяржпагранслужба Украіны
-
«Рэактыўны шахед урэзаўся ў мой дом». Расіяне спрабавалі кропкавым ударам забіць дарадцу міністра абароны Украіны, спецыяліста па радыётэхналогіях
-
УСУ апублікавалі відэа знішчэння дэсантных караблёў у бухце Севастопаля
Цяпер чытаюць
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы79
Каментары