У прадстаўніцтве Беларусі ў Жэневе працуе кадэбіст — «Рабочы рух»
У чэрвені ў Жэневе праходзіла Міжнародная канферэнцыя працы. Туды скіравалася дэлегацыя ад лукашэнкаўскага прафсаюза на чале з Міхаілам Ордам. Але куды больш цікавым быў іншы пасланнік рэжыму.
Пра яго расказаў на ютуб-канале «Рабочага руху» прадстаўнік незалежнай ініцыятывы Юрый Рававы, які таксама прысутнічаў на той канферэнцыі.
Па словах Рававога, на канферэнцыю быў акрэдытаваны ў тым ліку супрацоўнік КДБ Яўген Ляднёў, які працуе як першы сакратар пастаяннага прадстаўніцтва Беларусі ў Жэневе.
Перад пленарным пасяджэннем ён стаяў ля ўваходу ў залу і кансультаваў іншых дэлегатаў ад лукашэнкаўскага прафсаюза, як сцвярджае Рававы. Ён не адразу пазнаў Ляднёва, бо той змяніў прычоску і адрасціў бараду.
Па інфармацыі «Рабочага руху», Ляднёў прыбыў у Жэневу ў 2021 годзе і мае пашпарт для прыкрыцця на іншае імя — Сяргей Гарчакоў. Супрацоўніку 34 гады, ён родам з Гродна.
На тым пасяджэнні ў Жэневе Міжнародная арганізацыя працы падтрымала рэзалюцыю аб прымяненні ў дачыненні да Беларусі артыкула 33 статута арганізацыі. Лукашэнкаўская дэлегацыя спрабавала гэтага не дапусціць.
Артыкул 33 статута МАП абвяшчае: «У выпадку, калі які-небудзь сябар арганізацыі ў вызначаны тэрмін не выканае рэкамендацый, што змяшчаюцца ў дакладзе Камісіі па расследаваннях або ў рашэнні Міжнароднага суда, калі такія маюцца, Адміністрацыйная рада можа рэкамендаваць канферэнцыі такія дзеянні, якія яна палічыць мэтазгоднымі для забеспячэння выканання гэтых рэкамендацый».
Рэзалюцыя прапануе ўдзельнікам МАП перагледзець свае адносіны з урадам Беларусі.
Прынятае рашэнне можа мець вынікам падтрымку з боку МАП выключных эканамічных санкцый за невыкананне рэкамендацый. Сярод іншага гэта тэарэтычна можа выліцца ў блакаванне любога экспарту і фактычнага ўстанаўлення эканамічнай блакады ў дачыненні да краіны, якая парушае правы работнікаў.
Цяпер чытаюць
Арыштаваны сенатар Карпіцкі, галоўны доктар Брэсцкай абласной бальніцы14
Каментары