Стаўленне жыхароў Польшчы да беларусаў істотна пагоршала, як вынікае з апытання «Палякі аб Беларусі і беларусах», праведзенага на замову Цэнтра Юльюша Мерашэўскага. 74% палякаў ацэньваюць Аляксандра Лукашэнку вельмі негатыўна, пазітыўна — усяго каля 3%. Яго ўспрымаюць у першую чаргу як «дыктатара, які мучыць уласны народ».
Галоўныя лічбы:
— толькі траціна (34%) палякаў лічыць, што беларусы прыязна ставяцца да Польшчы. У 2020 годзе так лічыла 63%.
— 88% палякаў дакладна ведаюць, хто такі Аляксандр Лукашэнка. Пра Святлану Ціханоўскую і Андрэя Пачобута ведае толькі 37%.
— 74% палякаў ацэньваюць Аляксандра Лукашэнку вельмі негатыўна, пазітыўна — усяго каля 3%. Яго ўспрымаюць у першую чаргу як «дыктатара, які мучыць уласны народ» і які «ўзмацняе залежнасць ад Пуціна і Расіі».
— 42% палякаў лічаць беларусаў інертнымі і пасіўнымі да расійскай агрэсіі ва Украіне. 39% — што беларусы ў большасці выступаюць супраць ваенных дзеянняў і салідарызуюцца з украінцамі. Што беларусы на баку Расіі, мяркуе толькі 12% палякаў.
— 79% палякаў згодныя, што Польшча зацікаўленая ў тым, каб у Беларусі запанавалі свабода і дэмакратыя. Што беларусы самі вінаватыя ў сваіх праблемах, бо абралі Лукашэнку прэзідэнтам, лічыць 35% палякаў. Што сітуацыя ў Беларусі — гэта праблема саміх беларусаў — 37%.
Даследчыкі адзначаюць, што падзеі апошніх гадоў карэнным чынам змянілі сітуацыю ў нашым рэгіене. І сёння Беларусь у польскім успрыманні ідзе следам за Расіяй, дзе пасля 2014 года назіралася тэндэнцыя адрознівання простых расіян ад уладаў у Крамлі.
Вайна супраць Украіны пагоршыла стаўленне палякаў не толькі да Лукашэнкі, але і да беларусаў. Адказнасць за гэта аўтары даследавання ўскладаюць на палітыку Расіі, якая стала «каменем на шыі» беларусаў.
Таксама прычынай называецца агрэсіўная палітыка Лукашэнкі, тэрор і рэпрэсіі, у тым ліку супраць польскай меншасці і культуры ў Беларусі.
У адносінах да беларусаў у польскім грамадстве захоўваецца трывалы стэрэатып, што наша нацыя пасіўная. Асабліва гэта ўзмацняецца на фоне канфлікту ва Украіне.
Пры гэтым палякі даволі моцна цікавяцца падзеямі ў Беларусі, якія выйшлі з пэўнай «зоны забыцця». Спрыяе ж павышанай зацікаўленасці геаграфічная і культурная блізкасць дзвюх краін.
Цяпер чытаюць
Юліяна Шаметавец з «Кіберпартызанаў» стала маці — расказвае пра дэкрэтны адпачынак у ЗША і тое, ці сапраўды можна сумяшчаць працу з мацярынствам4
Каментары