Беларуска Ілія прайшла яшчэ адзін этап адбору ў дзявочы гурт, арганізаванага буйнымі гуказапісвальнымі кампаніямі — паўднёвакарэйскай Hybe Corp. і амерыканскай Geffen Records. Пра гэта піша выданне «Беларусь и мир».
Hybe Corporation запісваў, напрыклад, звышпапулярны карэйскі бойс-бэнд BTS, чые фанаты складаюць адзін з найбуйнейшых фэндомаў у свеце.
K-pop (карэйскі поп) узнік у Паўднёвай Карэі спачатку як проста музычны жанр, які ўвабраў у сябе элементы заходняга электрапопа, хіп-хопа, танцавальнай музыкі і сучаснага рытм-н-блюза, але сёння ён ператварыўся ў маштабную музычную субкультуру з мільёнамі прыхільнікаў ва ўсім свеце.
Маштабны праект адбору The Debut: Dream Academy ў жаночы K-pop-гурт доўжыцца ўжо трэці год. Менавіта ў час першай кампаніі быў створаны гурт BTS, а другі адзначыўся працай з Джонам Ленанам, Донай Самэр, Элтанам Джонам, Шэр і іншымі зоркамі.
Удзельніц у гэтым адборы падзялілі на чатыры каманды, дзве вакальныя і дзве танцавальныя, і далі першае заданне, каб дзяўчаты маглі паказаць свой талент. Паралельна ў сацсетках ішло галасаванне заўзятараў.
Ілія трапіла ў групу вакалістак з Карлі, Лексі, Бруклін і Манон. Яны выканалі кавер-версію Білі Айліш на песню Робін Dancing on my own. Праўда, беларусцы, як і яшчэ шэрагу ўдзельніц, дастаўся толькі адзін сольны радок.
Тым часам шматдзённае галасаванне завяршылася такім чынам, што наша суайчынніца апынулася на 16 месцы.
Паводле правіл конкурсу, на гэтым этапе адбору з 20 дзяўчат мусіла застацца 18. Пры гэтым удзельніцы, якія занялі па выніках фанацкага галасавання першыя шэсць пазіцый, атрымлівалі «імунітэт».
Вынікі былі прэзентаваныя канкурсанткам у вельмі драматычнай манеры. На стале ляжала 18 канвертаў, і па чарзе называліся імёны тых, хто прайшоў у наступны этап.
Урэшце Ілія засталася ў ліку апошніх трох дзяўчат, чый лёс яшчэ не быў раскрыты. І ўсё ж менавіта беларусцы ўсміхнулася ўдача: пасля доўгай паўзы было названа яе імя.
Цяпер удзельніцы адбору адправіліся ў Паўднёвую Карэю для праходжання наступнага этапу. Сярод іншых мерапрыемстваў 4 кастрычніка іх чакае сустрэча з фанатамі ў Сеуле. А хто пераадолее новае выпрабаванне, стане вядома 9 кастрычніка.
Пра беларуску, якая трапіла ў лік фіналістак, вядома мала. Як высветліла «Зеркало», дзяўчыне 21 год, яе старонка ў TikTok з вакальнымі запісамі мае 2,9 млн падпісчыкаў і 91,1 млн лайкаў. Песні яна выконвае ў асноўным на англійскай мове, але паведамляе, што валодае таксама рускай, іспанскай і трохі карэйскай мовамі. На некаторых відэа ёй падпявае маці, у якой таксама добры голас. У Instagram дзяўчына піша, што падтрымлівае Украіну.
Цяпер чытаюць
У Польшчы арыштавалі былога кіраўніка беларускага «Паспалітага рушэння» — пагражае 10 год за наркотыкі23
Каментары