11 дзён арышту прысудзілі адміністратарцы евангельскай царквы ў Лепелі
Валанцёрка і адміністратарка евангельскай царквы ў Лепелі Вольга Мадатава была асуджаная на 11 сутак адміністрацыйнага арышту яшчэ ў кастрычніку, паведамляе ініцыятыва «Хрысціянская візія». Такое рашэнне прыняў суддзя Дзмітрый Васюк з суда Лепельскага раёна.
65-гадовую Вольгу Мадатаву затрымалі 21 кастрычніка, а праз два дні ёй прысудзілі 11 дзён адміністрацыйнага арышту за «несанкцыянаванае пікетаванне» праз сацсеткі. Абвінавачаная нібыта мела падпіску на суполку з Пагоняй на аватарцы. Таксама яе асудзілі за «распаўсюд экстрэмісцкіх матэрыялаў» (у пратаколе згадвалася падабайка пад публікацыяй «Радыё Свабода»).
«На падставе ч. 1 арт. 24.23 КаАП і ч. 2 арт. 19.11 КаАП суддзя пакараў жанчыну на дзесяць сутак паводле кожнага артыкула. Шляхам частковага складання канчаткова вызначыў ёй спагнанне ў выглядзе арышту на тэрмін 11 сутак», — удакладняе «Віцебская Вясна».
Вольга Мадатава — верніца евангельскай царквы, у мясцовай прэсе яе згадвалі як адміністратарку царквы. У Лепелі жанчыну ведаюць таксама як валанцёрку, якая дапамагала нямоглым і пажылым людзям.
Каментары