На трасе пад Гомелем пабудавалі інтэлектуальны наземны пераход для жывёл
На ўчастку трасы М-10 (мяжа Расіі (Селішча) — Гомель — Кобрын) недалёка ад Гомеля арганізавалі эксперыментальны інтэлектуальны наземны пераход для дзікіх жывёл. Пілотны праект быў часткай праграмы па павышэнні бяспекі дарожнага руху і мінімізацыі ДТЗ з удзелам дзікіх жывёл, паведамілі ў Міністэрстве транспарту і камунікацый.
Гэты наземны пераход для жывёл складаецца з некалькіх элементаў:
- ахоўны плот уздоўж дарогі даўжынёй 2,6 км;
- два ўчасткі дарогі шырынёй па 10 м з адмысловым шурпатым пакрыццём (перад і пасля пераходу), якое заклікана ўтрымліваць капытных у межах пераходу;
- дарожнае асвятленне з двух бакоў пераходу на адлегласці 65 м;
- інтэлектуальная сістэма распазнавання выхаду жывёл на праезную частку
У сістэме ўсталяваныя дзве гібрыдныя відэакамеры, якія здымаюць адразу ў двух дыяпазонах — аптычным і інфрачырвоным, радар-дэтэктар і святлодыёдныя знакі «Дзікія жывёлы».
Пры з'яўленні дзікай жывёлы ў межах камеры або радара інфармацыя пра гэта перадаецца на прамысловы камп'ютар. Той з дапамогай адмысловай сістэмы «фармуе агульную наладжвальную зону дэтэкцыі жывёл», уключае святлодыёдныя знакі і дарожнае асвятленне, а калі жывёліна пакідае зону кантролю — выключае ўсё да з'яўлення наступнай.
За 360 м да пераходу ўсталявалі спецыяльны дарожны знак і з дапамогай знакаў арганізавалі паэтапнае зніжэнне хуткасці транспартных сродкаў: за 260 м да пераходу ў цёмны час сутак кіроўца абавязаны будзе знізіць хуткасць са 100 да 90 км/г, за 60 м да пераходу — з 90 да 70 км/г.
Каментары