Аргкамітэт марксісцкай партыі абвясціў пра стварэнне ячэек у Мінску
Партыя, якую збіраюцца заснаваць Бухвостаў, Вазняк і Калякін, прыступіла да фармавання «рэгіянальнай вертыкалі».
«Рэспубліканскі арганізацыйны камітэт па стварэнні ў Беларусі левай дэмакратычнай партыі, ідэйна-палітычнай платформай якой будзе марксізм (я адзін з яго сустаршыняў — звяртайцеся), прыступіў да фарміравання рэгіянальнай «вертыкалі». Сёння (у панядзелак) у Мінску мы правялі сустрэчу грамадзян, на якой быў утвораны гарадскі арганізацыйны камітэт», — напісаў Сяргей Вазняк у сваім фэйсбуку.
Старшынёй мінскай філіі абраны Аляксандр Паўлаў, які раней узначальваў сталічную арганізацыю Партыі камуністаў Беларусі/партыі «Справядлівы свет» (ліквідаванай уладай летась).
Першымі задачамі аргкамітэта будуць: рэкрутынг патэнцыйных членаў партыі, стварэнне ячэек у раёнах сталіцы, правядзенне палітычнай вучобы ў кантэксце падрыхтоўкі да Устаноўчага з'езду партыі. У найбліжэйшы час створым аналагічныя аргкамітэты ва ўсіх абласцях Беларусі, дадаў Сяргей Вазняк.
***
Навіна пра тое, што Калякін, Вазняк і Бухвостаў збіраюцца стварыць новую партыю на базе марксізму, з'явілася ў снежні.
Яе ідэйнай асновай павінен быць марксізм, а партыя павінна замяніць ліквідаваную Вярхоўным судом Беларускую партыю левых «Справядлівы свет» (да 2009 года — Партыя камуністаў Беларусі).
«У Беларусі не засталося палітычных партый, якія маюць адрозны ад улады погляд на становішча спраў у краіне і прапануюць грамадству альтэрнатыўныя варыянты палітычнага і сацыяльна-эканамічнага развіцця дзяржавы. … Мы заклікаем грамадзян левых дэмакратычных поглядаў далучацца да нашай працы. Беларусь мае патрэбу ў масавай левай палітычнай партыі, якая базуецца на каштоўнасцях свабоды, роўнасці, сацыяльнай справядлівасці, салідарнасці і народаўладдзя», — гаварылася ў заяве аргкамітэта партыі.
На пачатку 2023 года ў Беларусі было 15 партый, пасля перарэгістрацыі і стварэння праўладнай партыі «Белая Русь» у краіне зарэгістраваныя чатыры партыі: «Белая Русь» (старшыня Алег Раманаў), Ліберальна-дэмакратычная партыя (Алег Гайдукевіч), Камуністычная партыя Беларусі (Аляксей Сокал), Рэспубліканская партыя працы і справядлівасці (Аляксандр Хіжняк). Усе апазіцыйныя партыі былі ліквідаваныя.
Бухвостаў, Вазняк і Калякін паспрабуюць стварыць новую партыю на базе марксізму
«Калі палітыка пытаюць, агент ты ці не агент, я не ведаю, што ён мусіць адказваць». Сяргей Вазняк патлумачыў, для чаго ім з Калякіным партыя
«Камуніст, які выступае за буржуазную рэвалюцыю». Пяць фактаў пра Сяргея Калякіна, які стварае «партыю марксісцкіх поглядаў»
Каментары