На летнія вакацыі дзецям палітвязняў сабралі больш за 20 тысяч еўра. Збор працягваецца
У рамках дабрачыннага збору для дзяцей беларускіх палітвязняў, які апошнія гады традыцыйна праводзіцца ў гэты час, ужо сабралі больш за 20 тысяч еўра. Збор праводзіцца на платформе фонду салідарнасці BySol.
Грошы накіруюць на дапамогу ў арганізацыі летняга адпачынку дзецям цяперашніх і былых палітвязняў. На кожнае дзіця да 16 гадоў выплацяць дапамогу ў памеры 100 еўра.
Цяпер збор працягваецца, заяўленая сума — 23 400 еўра.
Летась на адпачынак дзяцей палітвязняў беларусы сабралі 28 006 еўра. Дапамогу тады атрымалі 270 дзяцей са 149 семʼяў.
Традыцыйная дзіцячая акцыя сёлета ладзіцца праектам «Хуткая гуманітарная дапамога», куды ўваходзяць Фонды Bysol, By_Help, «Страна для жизни», Dissidentby i Асацыяцыя беларускага бізнэсу за мяжой (ABBA).
1 чэрвеня ў варшаўскай прасторы Kwadrat Praski адбудзецца дабрачынны фестываль Belarus Outside Sound System. На ім будзе прэзентавана вінілавая плытка з аднайменнай рэйв-складанкай ад беларускіх электронных прадзюсараў. Арганізатары фестывалю — музычная супольнасць Belarus Outside Sound System — прапануюць усім жадаючым паслухаць самую незвычайную беларускую музыку і ў падзяку пакінуць данат на летні адпачынак дзецям палітвязняў. Асабліва шчодрыя данатары атрымаюць унікальны вініл у падарунак.
Кожны з 14 артыстаў на фэсце будзе прэзентаваць сваю праграму ці новы складнік лайф-выступу. Света Бень выступіць супольна з Сяргеем Навіцкім у новым электронным праекце пад назвай WTBSK, а Анастасія Рыдлеўская ўпершыню выступіць «жыўцом». Таксама на фэсце выступяць Сяргей Пукст са сваім праектам Георгій Дабро, Ганна Жданава, Domsun, PocketRave і Syntrig. Дыджэй-сэты адыграюць Papa Bo Selektah, Schmoltz, Kornej, Eye-Q, Scarlett і Uhead.
Сабраныя данаты будуць перанакіраваныя на збор, арганізаваны ў межах традыцыйнай дзіцячай акцыі супольным праектам беларускіх фондаў «Хуткая гуманітарная дапамога».
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»30
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары