У Дзяржынску паставілі скульптуру «Меч Неўскага, шчыт Дзяржынскага». Яе перападарыў Лукашэнка
Сёння ў Дзяржынску паставілі скульптурную кампазіцыю «Меч Неўскага, шчыт Дзяржынскага», якая прэзентуецца як «падарунак гораду і гараджанам ад Аляксандра Лукашэнкі». Яе вырабіў фаніпальскі майстар Уладзімір Канонік, паведамляе мясцовая раёнка.
![](http://nnexpictures.fra1.digitaloceanspaces.com/img/w732d4webp1/photos/z_2024_06/photo_2024-06-29_11-33-05-dhb87.jpg.webp)
Лукашэнку гэтую працу падарылі падчас адкрыцця ім фізкультурна-аздараўленчага комплексу «Алімп» у Дзяржынску, а ён загадаў пакінуць падарунак у горадзе, сказаўшы, што, маўляў, «цяпер у Дзяржынску будуць ведаць, што я іх абараняю».
Чыноўнікі, як сцвярджаецца, пры выбары месца для скульптуры перабралі з дзясятак варыянтаў і спыніліся на невялікім скверы па вул. 1-й Ленінскай побач з Дзяржынскім райвыканкамам.
Паставілі скульптуру раніцай 29 чэрвеня, а побач з ёй размясцілі дошку, на якой выбілі «несмяротную» цытату з Лукашэнкі. Раёнка рэпартаж з месца падзеі суправаджае адпаведным пафасам.
![](http://nnexpictures.fra1.digitaloceanspaces.com/img/w732d4webp1/photos/z_2024_06/photo_2024-06-29_11-26-54-e4mrc.jpg.webp)
Каментары