За «абразу прадстаўніка ўлады» мастачцы з Полацка прызначылі прымусовае лячэнне. Яна вярнулася з Польшчы

19 ліпеня яе прозвішча з'явілася ў «экстрэмісцкім спісе МУС», адкуль стала вядома, што ёй прызначаны «прымусовыя меры бяспекі і лячэння». Верагодна, падставай для крымінальнай справы сталі допісы палачанкі ў сацыяльных сетках. «Віцебская вясна» распавяла падрабязнасці пераследу мастачкі з Польшы: пра выкарыстанне яе прапагандыстамі і вяртанне дадому з Польшчы. 

Літаратурна-творчая асоба

Так Нэлі Алфёрава называла сябе ў сацыяльных сетках. Яна зарэгістравана рамесніцай, выстаўляла на продаж свае карціны і сувеніры. Пісала вершы і апавяданні для дзяцей. На сайце Полацкага дзіцячага прытулку можна знайсці інфармацыю пра навагоднюю сустрэчу з пісьменіцай Нэлі Алфёравай у 2018 годзе.

Паводле базы зваротаў у КДБ, якая з'явілася ў інтэрнэце, у 2016 годзе палачанка пісала туды заяву пра карупцыю ў Полацку. Быў і яшчэ адзін зварот у гэтую структуру — у 2017 годзе. Нэлі Алфёрава пісала, што «зацікаўлена ў працаўладкаванні», і дасылала сваё рэзюмэ. З допісу не зразумела, ці яна хацела ўладкавацца на працу менавіта ў КДБ, ці прасіла паспрыяць працаўладкаванню ў іншае месца.

Знаёмыя адзначаюць, што Нэлі — вельмі эмацыйная жанчына, якая не церпіць несправядлівасці і хваравіта на яе рэагуе. І дзеля адстойвання сваіх поглядаў здольная на адчайныя ўчынкі.

У 2019 годзе Алфёрава балатавалася ў Палату прадстаўнікоў па Полацкай выбарчай акрузе №27. Гэты факт дзяржаўныя прапагандысты прыгадаюць ёй пазней, у 2023 годзе.

Была неаднаразова пакараная па адміністрацыйных артыкулах пасля 2020 года

Праваабаронцам вядомыя некалькі фактаў адміністрацыйнага пераследу Нэлі Алфёравай. Пра некаторыя з іх яна распавядала ў адным са сваіх відэазваротаў да Лукашэнкі і вышэйшых дзяржаўных чыноўнікаў, дэталі іншых былі высветлены ў судах.

У 2020 годзе палачанка была назіральніцай на прэзідэнцкіх выбарах. На той час у сілавых структураў яна ўжо была на адмысловым уліку. 6 лістапада 2020 года ў Полацку праводзілі мітынг з нагоды адкрыцця адрамантаванага моста і вельмі баяліся правакацыяў. Супрацоўнікі міліцыі былі ў стане «боегатоўнасці» і папярэджвалі мясцовых актывістаў аб недапушчэнні правакацыяў.

Сілавікі прыйшлі да Алфёравай і сустрэлі яе каля дома. Яны былі ў цывільнай вопратцы і прыехалі на машыне без знакаў прыналежнасці да МУС. Калі адзін з мужчынаў пачаў задаваць ёй пытанні на вуліцы, яна праігнаравала іх і не спынілася, бо спяшалася ў краму. Жанчыну сталі гвалтам зацягваць у машыну, яна супраціўлялася і клікала на дапамогу. Нэлі Алфёраву завезлі ў РАУС і пратрымалі там пяць гадзін.

У гэты час дома заставалася дзіця з інваліднасцю. Супраць палачанкі склалі два пратаколы — за «непадпарадкаванне міліцыі» і за «абразу службовай асобы». 3 снежня суддзя Наталля Санковіч аштрафавала Алфёраву на 25 базавых велічыняў.

5 кастрычніка 2021 года суд прызнаў Нэлі Алфёраву вінаватай у «публічным дэманстраванні нацысцкай сімволікі і атрыбутыкі» ў VK. А таксама абвінаваціў яе ў «распаўсюдзе экстрэмісцкай прадукцыі». Жанчыну аштрафавалі на 40 базавых

Ад'езд у Польшчу і відэаролікі, скарыстаныя прапагандыстамі

Год таму на тэлеканале «Звязда» выйшла перадача «Па той бок «змагарства»», дзе былі выкарыстаныя відэаролікі Нэлі Алфёравай, якая ў канцы 2021 года вырашыла з'ехаць з Беларусі. Жанчына з сынам паехалі ў Польшчу. У відэароліках яна распавядала пра праблемы, з якімі давялося сутыкнуцца ў эміграцыі. Але дзяржаўныя прапагандысты перакруцілі яе гісторыю на свой лад: маўляў, «розныя фонды» абяцаюць беларусам пажыццёвае ўтрыманне ў замежжы, але не спраўджваюць абяцанні. І вось, маўляў, жанчына-беларуска сутыкнулася з неабходнасцю шукаць працу і жытло…

Нэлі Алфёрава наракала і на слабую падтрымку польскіх уладаў, і на беларускія дэмакратычныя сілы, дзейнасць якіх раней шчыра падтрымлівала. Знаёмыя эмігранты-беларусы прапаноўвалі жанчыне дапамогу, але яна адмаўлялася і пры гэтым «выглядала падаўленай, зломленай».

Вядучая праграмы на тэлеканале «Звязда» дзякавала Алфёравай за шчырасць і запрашала хутчэй вярнуцца дадому. Жанчына і насамрэч неўзабаве вярнулася ў Беларусь.

Вяртанне ў Беларусь і крымінальная справа

Прыехаўшы ў Полацк, Нэлі Алфёрава працягвала пісаць у сацсетках пра бюракратыю ў дзяржаўных установах, з якой даводзілася сутыкацца. Параўноўвала стаўленне да людзей польскіх і беларускіх чыноўнікаў, прычым не на карысць апошніх. Крытыкавала стан полацкіх прадпрыемстваў, адгукалася на падзеі ў свеце.

Але сябры заўважалі, што допісы жанчыны часам бывалі сумбурныя, а ўчынкі — непрадказальныя, што яна скардзілася на псіхалагічнае знясіленне і шукала ад гэтага паратунку — чытала шмат літаратуры па псіхалогіі.

Напрыканцы 2023-га на старонках Нэлі Алфёравай перыядычна з'яўляліся тэксты з крытыкай дзейных беларускіх уладаў. І адначасова жынчына паведамляла пра тое, што яе патаемна пераследуюць, што ў сваёй кватэры яна знаходзіць схаваныя відэакамеры, а на вуліцы яе суправаджаюць віжы.

Таксама ў сацыяльных сетках жыхаркі Полацка можна заўважыць шмат рэпостаў з інтэрнэт-рэсурсаў, прызнаных «экстрэмісцкімі». Верагодна, супрацоўнікі міліцыі заўважылі гэта, а па затрыманні сталі шукаць падставаў для распачынання ўжо не адміністрацыйнай, а крымінальнай справы.

Апошнія допісы жанчыны ў сацыяльных сетках датаваныя пачаткам лютага гэтага года.

Праваабаронцы высвятляюць, з кім застаўся яе непаўналетні сын, які мае інваліднасць.

• 1
• 0
• 0
• 0
• 1
• 10
• 1
• 0