Не паспелі амерыканцы ўвайсці пад Курск, як прапаганда абвесціла аб іх знішчэнні. Што вядома?
Расійскія Z-каналы справаздачыліся аб знішчэнні «наймітаў амерыканскай прыватнай ваеннай кампаніі FOG», якія нібыта спрабавалі ўзяць населены пункт на ўсход ад Суджы. У той жа час у інтэрнэце стала з'яўляцца ўсё больш сведчанняў аб прысутнасці на тэрыторыі Расіі былых марпехаў ЗША, якія дапамагаюць украінскай арміі ў наступе.
![](http://nashaniva.com/img/w840d4webp1/photos/z_2024_08/mycollages-7-s2awf.png.webp)
Пракрамлёўскі тэлеграм-канал Shot са спасылкай на крыніцы сцвярджае, што «найміты прыватнай ваеннай кампаніі ЗША Forward Observations Group» разам з УСУ спрабавалі штурмаваць сяло Руская Канапелька, што на ўсход ад Суджы.
Па версіі прапаганды, падчас атакі былі забітыя да 60 украінскіх вайскоўцаў, у ліку якіх былі «амерыканскія найміты», і знішчаныя некалькі адзінак бранятэхнікі УСУ.
![](http://nashaniva.com/img/w732d4webp1/photos/z_2024_08/2024-08-22162003-fqymk.png.webp)
Украінскае камандаванне гэтую інфармацыю пакуль ніяк не каментавала, але сама група FOG выклала ў інстаграме сторыз, дзе іранічна адказала расійскай прапагандзе і прапанавала закупляць свой мерч.
«Сумна, але давядзецца прызнаць — усе супрацоўнікі FOG цяпер мёртвыя. Памерлі нашыя амерыканскія браты-найміты-геі. Мы будзем памятаць пра іх, купляючы мерч, які праз 20 хвілін з'явіцца ў продажы», — іранічна адказала група FOG.
![](http://nashaniva.com/img/w732d4webp1/photos/z_2024_08/2024-08-22184058-bw9vs.png.webp)
У той жа час у сеціве стала з'яўляцца больш фота, якія могуць сведчыць аб наяўнасці ў Курскай вобласці добраахвотнікаў з ЗША. Некаторыя здымкі публікаваліся непасрэдна ў сацсетках групы FOG і ў іншых акаўнтах, звязаных з ёй.
![](http://nashaniva.com/img/w732d4webp1/photos/z_2024_08/gvkhxuuxmaayf-n-5l0d1.jpeg.webp)
![](http://nashaniva.com/img/w732d4webp1/photos/z_2024_08/saveclipapp_299099397_1153406725479001_2087091078211288198_n-dwwrl.jpg.webp)
Нагадаем, што амерыканская недзяржаўная вайсковая арганізацыя Forward Observations Group («Група нападу і назірання»/FOG), якая складаецца з былых марпехаў і спецназаўцаў ЗША, нядаўна прызнала свой удзел ва ўкраінскім наступе пад Курскам.
Адпаведную публікацыю FOG зрабіла на сваёй афіцыйнай старонцы ў інстаграме, куды набегла велізарная колькасць прарасійскіх ботаў і звычайных расійскіх карыстальнікаў, якія пачалі пагражаць амерыканцам расправай і спрабаваць іх пераконваць у «непазбежнай перамозе рускай зброі».
Не засталіся ў баку і расійскі МЗС, Савет Федэрацыі Расіі і мноства Z-каналаў, якія абвінавацілі ЗША ў адкрытай агрэсіі супраць Расіі і абвясцілі «амерыканскіх наймітаў» законнай вайсковай цэллю, паабяцаўшы ім «або смерць, або пажыццёвае зняволенне за наёмніцтва ў выпадку іх трапляння ў палон».
Аб тым, што сабой уяўляе амерыканская вайсковая група FOG, як даўно яна дзейнічае ва Украіне і якімі магчымасцямі валодае, «Наша Ніва» пісала тут.
Каментары