Прэм'ер-міністр Ізраіля Біньямін Нетаньяху заявіў прэзідэнту ЗША Джо Байдэну, што гатовы нанесці ўдар па вайсковых аб'ектах у Іране, але не па нафтавых ці ядзерных. Пра гэта паведамілі дзве інфармаваныя крыніцы газеце The Washington Post.
Паводле іх, гэта адбылося падчас тэлефоннай размовы двух лідараў на мінулым тыдні. Да гэтага Байдэн адмовіўся падтрымаць удар Ізраіля па іранскіх ядзерных аб'ектах у адказ на масіраваны абстрэл ізраільскай тэрыторыі.
У выніку, як адзначыў адзін са суразмоўцаў WaPo, Нетаньяху «заняў больш памяркоўную пазіцыю». Ён запэўніў, што атака будзе спланаваная такім чынам, каб пазбегнуць уплыву на выбары прэзідэнта ЗША, якія адбудуцца ў лістападзе.
Іншая крыніца выдання ўдакладніла, што Армія абароны Ізраіля (ЦАХАЛ) збіраецца нанесці ўдар па Іране да выбараў у ЗША, то-бок да 5 лістапада. У адваротным выпадку адсутнасць рэакцыі Ізраіля «можа быць расцэненая як слабасць», дадаў ён.
Удар Ізраіля па нафтавых аб'ектах Ірана мог прывесці да рэзкага росту цэн на энерганосьбіты, а атака на ядзерныя аб'екты краіны справакавала б далейшую эскалацыю і прамое ўцягванне ЗША ў канфлікт, адзначалі аналітыкі. Таму ў Вашынгтоне з палёгкай успрынялі рашэнне Нетаньяху нанесці ўдар па вайсковых аб'ектах, дадалі крыніцы WaPo.
Іран нанёс масіраваны ракетны ўдар па Ізраілі ўвечары 1 кастрычніка. Паводле даных ЦАХАЛ, усяго было выпушчана больш за 200 ракет, большасць з якіх збілі сродкамі супрацьпаветранай абароны (СПА). Тэгеран назваў атаку адказам на гібель лідара ліванскай групоўкі «Хезбала» Хасана Насраллы і генерал-маёра КСІР Абаса Нілфарышана пры ўдары Ізраіля па Бейруце 27 верасня, піша The Moscow Times.
Каментары