Жыхарка Гродна нарадзіла 14-е дзіця. Дзяўчынцы далі незвычайнае імя
Старэйшай дачцэ ў шматдзетнай сям'і ўжо 24 гады.
Жыхарка Гродна Алена Осіна нарадзіла 14-е дзіця. Дзяўчынка нарадзілася 5 лютага. Ёй далі незвычайнае імя Авігея, што азначае «радасць бацькі».
«Мы ад пачатку хацелі вельмі вялікую сям'ю. Для нас гэта было радасцю. Усе дзеці вельмі доўгачаканыя, радасныя. Мы вельмі шчаслівыя. Я лічу, што быць мамай — гэта велізарнае шчасце, а быць мамай 14 дзяцей — гэта шчасце, памножанае на 14», — расказала Алена.
Самаму старэйшаму дзіцяці ў сям'і — Ніне — ужо 24 гады, а самаму малодшаму да нараджэння Авігеі — хлопчыку Авініру — 2 гады. У сям'і 9 хлопчыкаў і 5 дзяўчынак. Трое старэйшых дзяцей ужо атрымалі вышэйшую адукацыю і працуюць, двое — студэнты, пяць — школьнікі, усе астатнія — дашкольнікі, піша БелТА.
Алена расказала, што сям'я вельмі любіць збірацца разам, ляпіць хінкалі, манты, вячэраць сумесна за вялікім сталом. Збор за агульным сталом — абавязковая традыцыя, члены сям'і камунікуюць, дзеляцца навінамі, перажываннямі, радасцямі.
У Беларусі ёсць як мінімум дзве сям'і, дзе выхоўваецца па 15 дзяцей. Адна з іх жыве ў Івацэвіцкім раёне: Сяргей і Ганна Халадовічы выхоўваюць шэсць хлопчыкаў і дзевяць дзяўчынак. Таксама 15 дзяцей нарадзіліся ў сям'і Алены і Сяргея Аляхновічаў на Міншчыне.
Цяпер чытаюць
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць3131
Каментары