Праект апарт-гатэля ў цэнтры Мінска, звязанага з Балабам, завярнулі — замінае сувязі з космасам
Шматпавярховы дом з апартаментамі планавала пабудаваць таварыства «Дынама», якім кіруе былы камандзір мінскага АМАПа Дзмітрый Балаба, але знайшліся важкія аргументы супраць.
Праект будучай новабудоўлі, якая павінна была з’явіцца ў Мінску на месцы двухпавярховага інтэрната па Акадэмічнай вуліцы, 11Б, нядаўна выносіўся на грамадскае абмеркаванне. Атмасферныя двухпавярховікі ўнутры квартала за Акадэміяй навук з'явіліся адразу пасля вайны. Кватэры ў іх выдавалі работнікам Акадэміі навук, а пазней адзін з будынкаў стаў інтэрнатам БФСТ «Дынама».
У студзені 2025 года кіраўніком таварыства «Дынама» выбралі былога кіраўніка сталічнага АМАПа Дзмітрыя Балабу. А ўжо ў канцы лютага на грамадскае абмеркаванне быў вынесены вельмі сыры праект шасціпавярховага апарт-гатэля на гэтым месцы, з прыгожымі рэндарамі і са слаба прапрацаванымі планамі.
Праекціроўшчыкам выступіла архітэктурная студыя «Ліхтар», якая нават не мае ўласнага сайта, сацсетак і партфоліа праектаў. Студыя знаходзіцца ў Бабруйску, што само па сабе вельмі дзіўна, бо ў сталіцы больш чым дастаткова дасведчаных праектных арганізацый, гатовых узяцца за такі прынадны праект. Дырэктарам студыі з’яўляецца Алег Каранкевіч, былы галоўны архітэктар Бабруйска.
Па выніках абмеркавання ў адміністрацыю Першамайскага раёна паступілі ўсяго два звароты. Адзін калектыўны зварот напісалі жыхары суседніх дамоў, які палічылі, што ў праекце дапушчаныя памылкі ў разліку патрэбнай колькасці машынамесцаў і ў выкананні санітарных разрываў.
Але сапраўдны незвычайным аказаўся другі зварот, які даслала Нацыянальная акадэмія навук Беларусі. Навукоўцы заявілі, што будаўніцтва гмаха ў гэтым месцы ў прынцыпе немагчымае. Паводле іх слоў, новабудоўля б часткова перакрыла працоўныя сектары прыёмнай антэны, што выкліча збой у працы Беларускай касмічнай сістэмы дыстанцыйнага зандавання Зямлі.
Архітэктурна-горадабудаўнічая рада пры галоўным архітэктары горада Мінска, азнаёміўшыся са зваротамі, завярнула праект, адправіўшы яго на дапрацоўку і рэкамендаваўшы працягнуць пошук аб'ёмна-прасторавага рашэння аб'екта.
«Наша Нiва» — бастыён беларушчыны
ПАДТРЫМАЦЬЦяпер чытаюць
У рэстаране «Мак.бай» на загад Лукашэнкі перайменавалі амерыкана. Як назвалі?22
Каментары