Сябар памерлага ў Кракаве Сяргея Дубініна расказаў, што папярэднічала трагедыі
15 красавіка ў кракаўскай кватэры знайшлі цела 50-гадовага актывіста з Рэчыцы. Сяргея Дубініна першым убачыў яго сусед і сябар Аляксандр Алмаеў. Ён жа распавёў «Нашай Ніве» аб тым, чым апошнім часам жыў Сяргей.
Актывіст і мастак з Рэчыцы Сяргей Дубінін з'ехаў у Польшчу ў красавіку 2021 года. Прычынай сталі пагрозы ад сілавікоў, якія тыя адрасавалі калектыўна яму і Аляксандру Алмаеву — за іх змаганне з мясцовымі чыноўнікамі.
Сябры доўгі час спрабавалі ўладкаваць для сябе творчую майстэрню — і ў самім горадзе, і ў вёсцы каля яго. Але ім у гэтым перашкаджалі, кажа Алмаеў. Ён лічыць, што справа ў тым, што мужчыны збіралі інфармацыю аб карупцыі ў Рэчыцы.
У 2020 годзе сябры збіралі подпісы за альтэрнатыўных кандыдатаў у прэзідэнты, выходзілі на пратэсты. Алмаеў праз гэта адбываў адміністрацыйны арышт.
З пераездам у Польшчу Дубінін і Алмаеў уладкаваліся на будоўлю. Жылі разам, у кватэры займаліся творчасцю — выразалі па дрэве.
У Беларусі нехта змяніў замок на іх майстэрні, Сяргей праз гэта вельмі перажываў. Лічыў, што іх жыццё «проста пусцілі па ветру прахам».
10 красавіка ў Алмаева здарыўся інфаркт, Дубінін адвёз яго ў бальніцу і вярнуўся ў кватэру.
Апошні раз яны размаўлялі ў суботу, 12 красавіка — Алмаеў зразумеў па голасе сябра, што той нападпітку.
Аляксандр запэўнівае, што Сяргей не злоўжываў алкаголем, бо меў адказную працу на вышыні на будоўлі.
У дзень выпіскі з бальніцы Алмаеў спрабаваў датэлефанавацца да Дубініна, каб той адвёз яго дадому. Але нумар быў недасяжны. Як толькі беларус патрапіў у хату, ён пабачыў у адным пакоі шмат крыві, а ў санвузле — мёртвага сябра.
«Нейкая ненатуральная поза ў яго была, нібыта ён да крану цягнуўся. І там таксама ўсё было крывёю заліта. А вось у калідоры, праз які трэба было прайсці — ніводнай кропелькі на паркеце. Нібыта па паветры ён перанёсся. Я не ведаю, што там адбылося», — кажа Алмаеў.
Ён не хоча верыць у версію з самагубствам сябра.
«Сяргей быў настроены змагацца і прыцягнуць рэчыцкіх карупцыянераў да адказнасці. Ён хацеў, каб інфармацыя пра іх прынамсі стала публічнай», — лічыць Алмаеў.
Праваабаронца Леанід Судаленка пракаментаваў смерць земляка.
«У студзені Сяргей разам з Аляксандрам былі ў Вільні, мы сустракаліся, размаўлялі, жартавалі і нішто не паказвала на тое, што Сяргей стаміўся жыць», — напісаў ён у фэйсбуку.
У Сяргея Дубініна засталіся два сыны. Яны і былая жонка памерлага жывуць у Беларусі.
«Байсол» пачаў збор сродкаў на пахаванне Сяргея Дубініна і дапамогу сям'і.
Памілаваныя 15 чалавек, сярод якіх 13 палітвязняў15
Каментары
[Зрэдагавана]