Беларуса ў Варшаве арыштавалі за махлярства пад выглядам банкаўскага супрацоўніка
У варшаўскім раёне Вавер паліцыя затрымала двух мужчын — 24-гадовага грамадзяніна Беларусі і 22-гадовага грамадзяніна Украіны. Іх падазраюць у серыі ашуканстваў, у тым ліку па схеме «банкаўскага супрацоўніка». Абодвух па рашэнні суда змясцілі пад трохмесячны часовы арышт, паведамляе паліцыя Варшавы.
Сутнасць махінацыі была ў тым, што падманшчыкі тэлефанавалі людзям і пераконвалі іх, што грошы на іх банкаўскіх рахунках знаходзяцца пад пагрозай. Адна з ахвяр паверыла гэтаму і перадала незнаёмцу 50 тысяч злотых (каля 12500 даляраў) і банкаўскія карты з PIN-кодамі.
Паліцэйскія аператыўна пачалі расследаванне, высветліўшы асобы і месцазнаходжанне падазраваных. У офісе, які фігураваў у справе, быў затрыманы 24-гадовы беларус, які асабіста забіраў грошы. Падчас ператрусу праваахоўнікі знайшлі вялікую колькасць наяўных: 135 500 злотых (каля 38 тысяч даляраў), 8660 даляраў і 200 еўра.
Падчас гэтых дзеянняў у офіс прыйшоў 22-гадовы ўкраінец, які сказаў, што прынёс чарговую суму — 39 тысяч злотых (каля 10 800 даляраў), і прызнаўся, што ўжо неаднаразова дастаўляў грошы ў гэты офіс, атрыманыя ад іншых людзей у розных гарадах Польшчы. Ён таксама быў затрыманы.
Следства працягваецца. Улады мяркуюць, што мужчын могуць абвінаваціць яшчэ ў шэрагу падобных злачынстваў, паколькі з'яўляюцца новыя доказы.
Каментары