У Беларусі ў 2025 годзе выяўлена 263 SIM-карты беларускіх аператараў, якія выкарыстоўваліся кіберзлачынцамі
Кібермахляры ўсё часцей выкарыстоўваюць абаненцкія нумары беларускіх аператараў сотавай сувязі, паведаміла журналістам старшы следчы па асабліва важных справах галоўнага ўпраўлення лічбавага развіцця Следчага камітэта Таццяна Шаюк, піша БелтА.
Паводле яе слоў, кіберзлачынцамі ўсё часцей выкарыстоўваюцца абаненцкія нумары беларускіх аператараў.
«На жаль, гэта вялікая праблема на сённяшні дзень. Бо пацярпелыя, убачыўшы нумар, зарэгістраваны ў беларускага аператара, з даверам уступаюць у дыялог з тым, хто тэлефануе, — распавяла Таццяна Шаюк. — Таму злачынцы вывучаюць, якая катэгорыя людзей больш уразлівая да таго ці іншага віду злачынства, і выкарыстоўваюць тыя інструменты, што маюць у распараджэнні».
Яна адзначыла, што аналіз крымінальных спраў паказвае: у 60% выпадкаў махлярства з выкарыстаннем вішынгу выкарыстоўваліся нумары беларускіх аператараў сотавай сувязі.
«Гэта не званкі праз сеткі сотавай сувязі, гэта званкі праз месенджары Viber, WhatsApp, Telegram, — удакладніла следчы. — У іншых схемах выкарыстоўваюцца SIM-карты, якія ўстанаўліваюцца ў SIM-боксы. З іх дапамогай злачынцы могуць атрымаць доступ да беларускіх нумароў нават знаходзячыся па-за межамі Рэспублікі Беларусь.
Для гэтага выкарыстоўваюцца спецыяльныя сэрвісы — GSM-шлюзы. У першым паўгоддзі 2025 года Следчым камітэтам сумесна з МУС выяўлена 14 такіх SIM-боксаў, у якасці падазраваных прызнаны 5 асобаў, а ў злачыннай дзейнасці выкарыстоўваліся 263 SIM-карты беларускіх аператараў».
Таццяна Шаюк дадала, што не прыводзіць інфармацыі па расійскіх аператарах: «Але ў гэтых SIM-боксах могуць быць не толькі беларускія SIM-карты, але і карты іншых аператараў. Яскравы прыклад — адна з крымінальных спраў, калі па месцы жыхарства грамадзяніна са Слоніма было знойдзена 10 SIM-боксаў, у слотах якіх на момант агляду знаходзілася 101 SIM-карта. У злачыннай схеме ўдзельнічалі 65 так званых дропаў. Папярэдняя сума нанесенай шкоды — 1 мільён 102 тысячы рублёў».
У дачыненні да гэтага грамадзяніна заведзена крымінальная справа. Яму пагражае да 5 гадоў пазбаўлення волі.
-
Каталіцкі сайт: На Першым канале каталіцкая імша засталася, знікла яна з канала «Культура»
-
Азаронак пра закрыццё беларускіх крам: Прыбралі таму, што вы гэта любілі. Мне не лянота сядзець і глядзець, дзе што прадаюць
-
Ціханоўская: Калі мы не пазбавімся гэтага рэжыму, пагроза з тэрыторыі Беларусі будзе заставацца пастаяннай
Каментары