Гандлёвы цэнтр «4 сезоны» адкрыўся ў мікрараёне «Чырвоны Бор» за Каменнай Горкай. Ён запрацаваў сёння а 14.00, але не менш за сотню мінчукоў сабраліся яшчэ да адкрыцця і чакалі, пакуль адчыняцца дзверы. Realt.by расказаў пра гэты гандлёвы цэнтр і што ў ім ужо працуе.
ГЦ «4 сезоны» адкрыўся па адрасе Скрыпнікава, 47. Гэта недалёка ад МКАД, у раёне вуліц Прытыцкага, Адзінцова і Мазурава. Ад станцыі метро «Каменная Горка» — крыху менш за кіламетр.
Пра гэты гандлёвы цэнтр спакойна можна было не чуць, але ягонае імя пры гэтым можа быць знаёмым: з такой жа назвай ёсць жылы комплекс на вуліцы Бяды. Забудоўшчык у ЖК і ГЦ адзін — ТАА «ТЭНКінвест». Акрамя гэтага, кампанія будавала жылыя комплексы «Аляксандраў Парк» і «Акварэль», гандлёвы цэнтр «Перекрёсток» і бізнэс-цэнтр «Тэнк».
Плошча гандлёвага цэнтра — 16 тысяч квадратаў, запланаваныя фудкорт, дзіцячы забаўляльны цэнтр і крыты паркінг на 300 машынамесцаў і наземная паркоўка.
Прадуктовая крама абрана не самая чаканая — «Дыяніс». Гэта полацкая сетка крам — і ў большасці сваёй крамы размешчаныя ў Віцебскай вобласці — Полацку, Наваполацку, Глыбокім, Віцебску. З часам «Дыяніс» стаў расці — крамы з'явіліся ў Гродне, Брэсце і Гомелі. У Мінск «Дыяніс» прыйшоў у 2018 годзе. Крама ў ГЦ «4 сезоны» стала восьмай у горадзе.
Нельга сказаць, што адкрыццё гандлёвага цэнтра гучна анансавалі ў інтэрнэце. Але вось шыльда на дзвярах пра тое, што запрацаваць ГЦ «4 сезоны» павінен а 14.00 16 снежня, з'явілася. І гэтага было дастаткова, каб жыхары раёна ў абед працоўнага дня сабраліся тут.
За паўгадзіны да адкрыцця пад дзвярыма стаялі некалькі дзясяткаў чалавек. Пазней, калі нават прыкінуць вельмі прыблізна, мінчукоў было дакладна не менш за сотню: нехта чакаў каля дзвярэй, нехта на прыступках каля ГЦ, дзеці былі на дзіцячай пляцоўцы. Калі дзверы адчынілі, каб зайшлі ўсе ахвотныя, спатрэбілася некалькі хвілін.
Пакуль што арандатараў у ГЦ няшмат, а на фасадзе вісяць аб'явы пра даступныя плошчы. Цяпер ужо працуюць заакрама, кавапункт, пару выспачак з выпечкай, пункт выдачы Wildberries, асноўны арандатар — супермаркет «Дыяніс». Сёння там абяцаюць зніжкі і актыўнасці ў гонар адкрыцця.
Для тых, хто плануе схадзіць у «Дыяніс» сёння — людзей цяпер там вельмі шмат. І хоць працуюць усе касы (і звычайныя, і касы самаабслугоўвання), пастаяць у чэргах давядзецца. У краме ёсць салата-бар, сушы-бар, свая кулінарыя, стаіць кава-аўтамат. Цэны стандартныя. Можна аформіць дысконтную карту. У гонар адкрыцця працуе пункт з аквагрымам для дзяцей.
Крама працуе штодня з 8.00 да 23.00.
Каментары