Апошнім часам у Брэсцкую бальніцу хуткай медыцынскай дапамогі штодня звяртаюцца як мінімум два-тры пацыенты з падазрэннем на шаленства: іх укусілі жывёлы.
Усяго з пачатку года ў Брэсцкай вобласці праведзена 280 даследаванняў на гэты вірус. І ў 25 выпадках дыягназ пацвердзіўся. Гэта ў пяць разоў больш, чым за такі ж перыяд 2025 года, адзначаюць спецыялісты.
— Перадача віруса шаленства чалавеку магчымая ад хворых на шаленства жывёл пры розных відах кантактаў. Гэта можа быць не толькі ўкус, але і драпіна, а таксама абслюняванне скурных пакроваў і слізістых абалонак, на якіх ёсць мікрарасколіны, — расказала тэлеканалу «Беларусь 4» загадчыца аддзялення асабліва небяспечных інфекцый Брэсцкага абласнога цэнтра гігіены і эпідэміялогіі Ірына Кляцко.
Шаленства часцей за ўсё выяўляюць у лісіц. Аднак яго пераносчыкамі могуць быць і іншыя жывёлы, у тым ліку хатнія — каты і сабакі. Лічыцца, што яны пачынаюць паводзіць сябе агрэсіўна, але гэта не заўсёды так.
— Калі мы бачым, што дзікая жывёла прыйшла ў населены пункт, на лецішча або на ўчастак, гэта з вялікай доляй верагоднасці сведчыць пра тое, што жывёла ўсё ж такі хворая на шаленства. Бо дзікія звяры звычайна стараюцца не падыходзіць да чалавека, — дадае спецыяліст.
Важна памятаць: калі пры заражэнні шаленствам хвораму не аказаць медыцынскую дапамогу, вынік будзе смяротным. Таму, калі ёсць сумненні, лепш перастрахавацца і звярнуцца да доктара.
Цяпер чытаюць
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары