У найбліжэйшыя дні ўзроўні вады ў рэках Беларусі будуць працягваць зніжацца. Пра гэта паведамілі ў Белгідрамеце.
За апошнія некалькі дзён на большасці рэк краіны ўжо назіраўся спад узроўню вады. На Дняпры каля Лоева ён апусціўся ніжэй за небяспечна нізкую адзнаку, а на Дзвіне ў Віцебску дасягнуў такога ўзроўню.
Паводле стану на 30 чэрвеня, на рэках краіны ўзровень вады зніжаецца да 9 сантыметраў за суткі або застаецца амаль без зменаў. На Нёмане каля Гродна, Дняпры каля Магілёва, Жлобіна і Лоева, Бярэзіне каля Бабруйска, а таксама на Сажы каля Крычава, Слаўгарада і Гомеля ўзроўні вады ўжо ніжэйшыя за адзнакі, неабходныя для бяспечнага суднаходства.
Тэмпература вады ў рэках цяпер складае ад +18 да +29 градусаў, а ў азёрах і іншых вадаёмах — ад +22 да +27 градусаў.
Паводле прагнозу гідролагаў, спад узроўню вады працягнецца. Чакаецца, што на Дняпры каля Рэчыцы і на Бярэзіне каля Светлагорска вада таксама апусціцца ніжэй за ўзровень, які забяспечвае суднаходства.
Каментары