Расійскі беспілотнік раніцай 1 кастрычніка трапіў у будынак школы ў Саламянскім раёне Кіева. Пачаўся пажар, але дзеці ў момант удару знаходзіліся ў сховішчы. Паводле папярэдніх звестак, ніхто з іх не пацярпеў.
Пра ўдар паведаміў мэр Кіева Віталь Клічко.
«У Саламянскім раёне траплянне беспілотніка ў будынак школы. Ёсць узгаранне. Дзеці знаходзіліся ў сховішчы. Экстранныя службы едуць на месца», — напісаў ён.
Паводле папярэдняй інфармацыі Кіеўскай гарадской адміністрацыі, сярод дзяцей пацярпелых няма.
Удар адбыўся за некалькі хвілін да 9‑й раніцы, калі вучні ўжо былі ў школе або ішлі на заняткі.
Яшчэ адзін расійскі беспілотнік ударыў па складскім будынку ў тым жа раёне. Інфармацыя пра магчымых пацярпелых невядомая.
29 верасня расійская кіраваная авіябомба разбурыла школу ў Сумах, дзе заняткі ў гэты час праходзілі ў сховішчы.
Каментары