Кандыдат ад АГП Яраслаў Раманчук да апошняга дня цягнуць з падачай дакументаў у ЦВК не стаў.
Кандыдат у прэзідэнты ад Аб’яднанай грамадзянскай партыі Яраслаў Раманчук да апошняга дня цягнуць з падачай дакументаў у ЦВК не стаў. Падаў у перадапошні.
Раманчук з’явіўся на плошчы Незалежнасці ў кампаніі з кіраўніком штабу, прадпрымальнікам Львом Марголіным, кіраўніком ініцыятыўнай групы, былым прарэктарам БДУ Анатолем Паўлавым і прэс‑сакратаром Ганнай Красулінай.
Да пінжакоў АГПістаў былі прымацаваныя жоўта‑зялёныя значкі. Гэтыя колеры і стануць афіцыйнымі кампаніі Яраслава Раманчука.
Зрэшты, сам эканаміст не выключае такой імавернасці, што адзіны кандыдат ад апазіцыі яшчэ можа быць вылучаны, але ўжо пасля этапу збору подпісаў. «Будзем размаўляць з апазіцыйнымі кандыдатамі. Магчыма, там будуць і адбельвальнікі Лукашэнкі. Натуральна, што з імі размовы быць не можа», — зазначыў Я.Раманчук.
Па ягоных словах, АГП ужо зараз мае дастаткова спецыялістаў, якія змогуць фарміраваць урад. Агулам у ініцыятыўную групу ўвайшло 1423 чалавекі.
Пакуль Раманчук насіў подпісы ў выбарчую камісію, журналісты ледзь не завербавалі яшчэ аднаго. Але міліцыянт, што прыйшоў праверыць, чаму так многа людзей сабралася разам, сказаў, што ён па‑за палітыкай.
Рашэнне па рэгістрацыі ініцыятыўнай групы пройдзе ў панядзелак. Сам Яраслаў у гэты дзень будзе ў Маскве, дзе пройдзе ягоная прэс‑канферэнцыя. У аўторак жа ён сустрэнецца з расійскімі журналістамі ўжо ў Мінску.
Ці не бянтэжыць каманду АГП, што многія сябры партыі перайшлі працаваць да Уладзіміра Някляева, адказаў Леў Марголін.
«Частка нашых партыйцаў кіруецца каштоўнаснымі прынцыпамі, але ёсць і прагматыкі, якім дзе болей дадуць, туды яны і ідуць. Было рашэнне Палітрады АГП, што сябры партыі, якія перайшлі працаваць да іншых кандыдатаў, павінны хаця б прыпыніць сяброўства ў арганізацыі. Тым не менш, вясельных генералаў у нас не будзе. Усе будуць збіраць подпісы», — зазначыў Л.Марголін.
Цяпер чытаюць
23‑гадовы ахоўнік з Астраўца загінуў за Расію на вайне. Паваяваў ён, відаць, каля месяца11
Каментары