Кожны чацвёрты з памерлых летась быў у працаздольным узросце

У 2010 годзе ў Беларусі памерла 137.132 чалавекі, паведаміў начальнік галоўнага ўпраўлення дэмаграфічнай статыстыкі Нацыянальнага статыстычнага камітэта Беларусі Аляксей Яркавец на прэс-канферэнцыі ў Мінску 18 мая.

Для параўнання: у 2009 годзе ў Беларусі памерла 135.097 чалавек, у 2005-м — 142 тыс., у 2008-м — 134 тыс. чалавек.

Агульны каэфіцыент смяротнасці (лік смерцяў на тысячу насельніцтва) у 2010 годзе склаў 14,4

(у Расіі гэты паказчык складае 14,3, ва Украіне — 15,2, у Польшчы — 10,1, Італіі — 9,8, Францыі — 8,5, Германіі -10,3, Літве — 12,6, Эстоніі — 12).

Прыкладна 54% ад агульнага ліку памерлі ад хвароб сістэмы кровазвароту (73.900 у 2010 годзе і 73.040 у 2009-м). Далей ідуць новаўтварэнні (13,4%, ці 18.443 чалавекі) і знешнія прычыны (14.281, ці 10,4%). У структуры смяротнасці ад знешніх прычын лідзіруюць самагубствы (2.462 у 2010 годзе супраць 2.743 у 2009-м), выпадковыя атручэнні алкаголем (2.458 у 2010-м супраць 2.495 у 2009 годзе), ДТЗ (1.462 у 2010 годзе супраць 1.588 у 2009-м).

Яркавец падкрэсліў, што смяротнасць у працаздольным узросце цяпер па-ранейшаму

больш чым на траціну вышэйшая, чым у канцы 1980-х гадоў.

Смяротнасць мужчын у 4,6 разу вышэйшая, чым жанчын, сказаў Яркавец.

Больш за ўсё чалавек памерла ў працаздольным узросце ад хвароб сістэмы кровазвароту (10 тыс., ці 31,9% ад усіх памерлых у 2010 годзе). Начальнік упраўлення дэмаграфічнай статыстыкі Белстата звярнуў увагу, што адбываецца «амаладжэнне загінулых ад захворванняў сардэчна-сасудзістай сістэмы». Другое месца ў структуры смяротнасці асоб працаздольнага ўзросту займаюць знешнія прычыны (31,8%). Так, у 2010 годзе 1.670 мужчын і 242 жанчыны працаздольнага ўзросту пакончылі з сабою, былі забітыя 301 мужчына і 95 жанчын.

Разам з тым Яркавец адзначыў дасягненні Беларусі ў памяншэнні дзіцячай смяротнасці. Паказчык дзіцячай смяротнасці ў 2010 годзе склаў 4 праміле (выпадкі на тысячу нованароджаных), тады як у 2009 годзе — 4,7 праміле. Гэта азначае, што ў краіне ў 2010 годзе прыйшлося чатыры памерлыя дзіцяці на тысячу народжаных жывымі. Яркавец прывёў для параўнання статыстыку еўрапейскіх краін. У Расіі гэты паказчык складае 7,5, ва Украіне — 9,1 у Аўстрыі — 3,7 у Нідэрландах — 3,8, у Германіі і Іспаніі — 3,5, у Швейцарыі — 4,3.

Мацярынская смяротнасць таксама знізілася. У 2010 годзе зафіксаваны адзін выпадак смерці жанчыны ў выніку ўскладненняў родаў і пасляродавага перыяду (у 2005-м — 10, у 2008-м — тры).

• 0
• 0
• 0
• 0
• 0
• 0
• 0
• 0